గతేడాది ఐపీఎల్ సీజన్లో కోల్కతా నైట్రైడర్స్ వైఫల్యానికి కారణం ఆల్రౌండర్ ఆండ్రూ రస్సెల్పై ఎక్కువగా ఆధారపడటమే అని అంటున్నాడు ఆ జట్టు కెప్టెన్ దినేశ్ కార్తీక్. దాంతో పాటు పేలవమైన ప్రదర్శన కూడా వెంటాడిందని తాజాగా ఇంటర్వ్యూలో తెలిపాడు.
ఐపీఎల్లో విజయవంతం కాకపోవడంపై రస్సెల్ గతంలోనే స్పందించాడు. జట్టు ఓటమికి కారణం తప్పుడు నిర్ణయాలు తీసుకోవడమే అని అన్నాడు. ఈ మాటలు కార్తీక్, రస్సెల్ మధ్య విభేదాలు తెచ్చిపెట్టాయి. ఈ సమస్యపై రస్సెల్తో చర్చించినట్లు తాజాగా వెల్లడించాడు కార్తీక్.
"నిజం చెప్పాలంటే వెస్టిండీస్ ఆటగాళ్లు కల్మషం లేనివారు. నేను చెప్పిన దాన్ని రస్సెల్ అర్థం చేసుకుంటాడని నాకు తెలుసు. వారు ఏమి చెప్పినా నిజాయితీగా చెబుతారు. అది ఎదుటివారు వాటిని ఎలా అర్థం చేసుకుంటారో అనే దానిపై ఆధారపడి ఉంటుంది. దాన్ని తప్పుగా తీసుకుంటే ఆ పొరపాటు మీదే అవుతుంది. రస్సెల్ జట్టు గెలవలేదనే కారణాల వల్ల సంతోషంగా లేడు. ఆ విషయం అతను చెప్పగా.. నేను దాన్ని గౌరవించా. ఆ తర్వాత క్షమాపణ చెప్పాడు. అదే రోజున నేను అతడితో మంచిగా వ్యవహరించకపోతే అది నా మూర్ఖత్వం అవుతుంది".
-దినేశ్ కార్తీక్, కోల్కతా నైట్రైడర్స్ కెప్టెన్
"నేను అతనితో నిజాయితీగా వ్యవహరించా. అప్పుడే నేరుగా రస్సెల్ దగ్గరకు వెళ్లి.. 'రస్ నీకేమి తెలుసు. నువ్వు చెప్పింది సరైంది అని నేను అనుకోను. ఎందుకంటే నువ్వు చెప్పిన విధానం మంచిది కాదు' అని అన్నా. దానికి అతను స్పందిస్తూ.. 'నేను ఎలా భావించానో అలానే బయటకు చెప్పా' అని అతడు వెల్లడించాడు. అప్పుడే ఆ వివాదం సద్దుమణిగింది. నాయకుడిగా తనను సంతోషపెట్టలేకపోవచ్చు. కానీ, మన చుట్టూ ఉన్న పరిస్థితులను మార్చగలిగినా.. అవి కచ్చితంగా మారవు." అంటూ కార్తీక్ చెప్పుకొచ్చాడు.
