మరో క్రికెటర్ పెళ్లి కొడుకు కాబోతున్నాడు. ఆస్ట్రేలియా ఆల్రౌండర్ మ్యాక్స్వెల్.. భారత సంతతికి చెందిన ఆస్ట్రేలియన్ యువతి వినీ రామన్ను త్వరలో వివాహం చేసుకోనున్నాడు. తాజాగా వీరి నిశ్చితార్థం జరిగింది. ఆ ఫొటోను ఈరోజు(బుధవారం) ఇన్స్టాలో పంచుకున్నాడు. పలువురు ఆటగాళ్లు.. సోషల్ మీడియా వేదికగా వీరిని అభినందిస్తున్నారు.
వినీ-మ్యాక్స్వెల్.. గత రెండేళ్ల నుంచి ప్రేమించుకుంటున్నారు. అయితే పెళ్లి ఎప్పుడు చేసుకుంటారనేది మాత్రం ఇంకా వెల్లడించలేదు. ఇటీవలే ఒత్తిడి కారణంగా జట్టు నుంచి తాత్కాలిక విరామం తీసుకున్నాడు మ్యాక్సీ. ఆ తర్వాత బిగ్బాష్ లీగ్లో పాల్గొన్నాడు. తాను కెప్టెన్సీ వహిస్తున్న మెల్బోర్న్ స్టార్స్ను ఫైనల్ వరకు తీసుకెళ్లాడు. రన్నరప్తో సరిపెట్టుకుందీ జట్టు.
వచ్చే నెలలో ప్రారంభమయ్యే ఐపీఎల్ కోసం సిద్ధమవుతున్నాడు మ్యాక్స్వెల్. ఇందులో కింగ్స్ ఎలెవన్ పంజాబ్ తరఫున ఆడనున్నాడు.
