మన్కడింగ్.. ఎప్పుడో 70ఏళ్ల క్రితం భారత ఆటగాడు వినోద్ మన్కడ్ చేసిన రనౌట్ ఆధారంగా ఇప్పటికీ ఆయన పేరుతోనే మన్కడెడ్ అని పిలుస్తున్నారు. అయితే... క్రీడా స్ఫూర్తి పేరు చెప్పి ఓ దిగ్గజ క్రీడాకారుడిని అవమానిస్తున్నారని భారత మాజీ ఆటగాడు సునీల్ గావస్కర్ అభిప్రాయపడ్డాడు. ఓ జర్నలిస్టు మన్కడెడ్ రాసినంత మాత్రాన మన క్రీడాకారుడిని అవమానించాల్సిన అవసరం లేదని ఆయన అన్నాడు.
జాస్ బట్లర్ను రవిచంద్రన్ అశ్విన్ రనౌట్ చేసినప్పటి నుంచి మన్కడింగ్పైనే అందరూ మాట్లాడుతున్నారు.
మన్కడింగ్పై గావస్కర్ మనోగతం:
"1940ల్లో నాన్స్ట్రైకింగ్లో ఉన్న ఆస్ట్రేలియన్ ఆటగాడు బిల్ బ్రౌన్ని వినోద్ మన్కడ్ రనౌట్ చేశాడు. అంతకుముందు రెండుసార్లు వినోద్ హెచ్చరించినా బ్యాట్స్మన్ వినలేదు. దీంతో క్రీజులో నుంచి బయటకు రాగానే వినోద్.. బ్రౌన్ని రనౌట్ చేశాడు. అప్పటి నుంచి ఈ విధమైన ఔట్ను మన్కడింగ్ అని పిలుస్తున్నారు. వినోద్ చేసిందే సరైనదే అని సర్ డాన్ బ్రాడ్మన్ లాంటి దిగ్గజాలు చెప్పినా మన్కడింగ్ అనే పేరు అలా పడిపోయింది" అని గావస్కర్ అన్నాడు.
"బంతి బ్యాట్కు తగిలిందని తెలిసినా క్రీజుని వీడని బ్యాట్స్మన్ని డబ్ల్యూజీ అని పిలవట్లేదు. బ్రియన్ లారా కొట్టిన బంతిని స్టీవ్ వా నేలను తాకిన తర్వాత క్యాచ్ అందుకుని ఔట్ అప్పీల్ చేశాడు. ఆ అంశాన్ని స్టీవ్ వా అని పిలవట్లేదు. అలాంటపుడు క్రీజు దాటి బయటికొచ్చిన నాన్స్ట్రైకర్ బ్యాట్స్మెన్ను రనౌట్ చేయడాన్ని ఎలా తప్పుపడతాం. ఒకవేళ క్రీడాస్ఫూర్తికి అనుగుణంగా ఉండాలనుకుంటే మన్కడింగ్ బదులు బ్రౌన్డ్(వినోద్ మన్కడ్ చేతిలో రనౌటైన బిల్లీ బ్రౌన్) అనే పేరుతో పిలవాలని" సునీల్ గావస్కర్ అభిప్రాయపడ్డాడు.
