భారత క్రికెట్ జట్టు మాజీ ఓపెనర్ గౌతమ్ గంభీర్ ప్రత్యక్ష రాజకీయాల్లో సరికొత్త ఇన్నింగ్స్ ప్రారంభించారు. దిల్లీలో కేంద్రమంత్రులు అరుణ్జైట్లీ, రవిశంకర్ ప్రసాద్ సమక్షంలో భాజపా తీర్థం పుచ్చుకున్నారు.
" దేశానికి ప్రత్యేక సేవ చేసుకునేందుకు అవకాశమిచ్చిన భాజపాకు ధన్యవాదాలు. జైట్లీ, రవిశంకర్ ప్రసాద్కు కృతజ్ఞతలు. ప్రధాని నరేంద్ర మోదీ విధానాలు నన్ను ఎంతో ప్రభావితం చేశాయి. అందుకే భాజపాలో చేరాను. నేను వారి అంచనాలను అందుకుంటానని భావిస్తున్నాను. ఎందుకంటే నేను ఏమి చేయగలనో క్రికెట్లో చూపించాను. దేశాన్ని మరింత గొప్పగా తీర్చిదిద్దడానికి, ఏదైనా మంచి చేయడానికి ఇది సరైన వేదిక."
- గౌతమ్ గంభీర్, భాజపా నేత
2011 వన్డే ప్రపంచకప్, 2007 టీ20 ప్రపంచకప్ విజయాల్లో కీలక పాత్ర పోషించిన గంభీర్ను... ఇటీవలే పద్మశ్రీ అవార్డుతో సత్కరించింది కేంద్రప్రభుత్వం. భాజపా వర్గాల సమాచారం ప్రకారం మీనాక్షి లేఖి ప్రాతినిథ్యం వహిస్తున్న 'న్యూ దిల్లీ' పార్లమెంట్ స్థానం నుంచి లోక్సభ ఎన్నికల బరిలో దిగనున్నారు గంభీర్.
