ఐపీఎల్ నిర్వహణలో ఎలాంటి మార్పులు లేకుండా పూర్తిస్థాయిలో జరపాలని సూచించాడు కోల్కతా నైట్రైడర్స్ కార్యనిర్వాహక అధ్యక్షుడు వెంకీ మైసూర్. మినీ ఐపీఎల్ లాంటి ఆలోచనలను ఫ్రాంచైజీలు ఏ మాత్రం అంగీకరించబోవని స్పష్టం చేశాడు.
"ఐపీఎల్లో మ్యాచ్లను కుదించి నిర్వహించాలన్న ఆలోచనకు మేము పూర్తి వ్యతిరేకం. ఇలాంటి ప్రత్యేకమైన టోర్నీని మినీ ఐపీఎల్గా నిర్వహించడం ఫ్రాంచైజీలకు ఏ మాత్రం అంగీకారం కాదు. పూర్తిస్థాయిలో జరగాలని మేము కోరుకుంటున్నాం".
- వెంకీ మైసూర్, కోల్కతా నైట్రైడర్స్ సీఈఓ
కరోనా మహమ్మారి విజృంభణ కారణంగా మార్చి నుంచి క్రీడా టోర్నీలన్నీ వాయిదా పడ్డాయి. వాటిలో ఐపీఎల్ కూడా ఉంది. కానీ, ఈ టోర్నీని తిరిగి ఎప్పుడు నిర్వహిస్తారనే దానిపై ఇంకా క్లారిటీ లేదు. ఆస్ట్రేలియా వేదికగా అక్టోబరు-నవంబరు మధ్య జరగాల్సిన టీ20 ప్రపంచకప్ వాయిదా పడితే.. ఆ సమయంలో ఐపీఎల్ను నిర్వహించాలని బీసీసీఐ భావిస్తోంది.
ఐపీఎల్ అనేది మన దేశంలోనే కాకుండా ప్రపంచవ్యాప్తంగా వినోదం పంచుతుందని అభిప్రాయపడ్డాడు కేకేఆర్ సీఈఓ. భారత క్రికెటర్లతో పాటు టోర్నీకి వెన్నెముకైన విదేశీ ఆటగాళ్లు ఇందులో ముఖ్యమైన పాత్ర పోషిస్తారని ఆశాభావం వ్యక్తం చేశాడు. కోల్కతా జట్టులో సునీల్ నరైన్, ఆండ్రూ రస్సెల్, ఇయాన్ మోర్గాన్ ఇప్పుడు పాట్ కమిన్స్ ముఖ్యమైన ఆటగాళ్లని గుర్తు చేశాడు.
ఇదీ చూడండి... వైరల్: క్వారంటైన్ కేంద్రంలో క్రికెట్ ఆడుతూ కాలక్షేపం
