ఆస్ట్రేలియాతో జరుగుతోన్న యాషెస్ సిరీస్లో ఇంగ్లాండ్ పట్టు బిగించింది. ఓవర్ నైట్ స్కోరు 10/0 తో ఉన్న ఇంగ్లీష్ జట్టు రెండో రోజు పై చేయి సాధించింది. ఓపెనర్ రోరీ బర్న్స్ (125) సెంచరీతో విజృంభించి.. బ్యాటింగ్ కొనసాగిస్తున్నాడు. కెప్టెన్ జోయ్ రూట్ (57) అర్ధసెంచరీతో ఆకట్టుకున్నాడు. ఆసీస్ బౌలర్లలో జేమ్స్ ప్యాటిన్సన్ రెండు వికెట్లు తీయగా.. కమిన్స్, సిడిల్ చెరో వికెట్ తీశారు. ప్రస్తుతం ఇంగ్లాండ్ 4 వికెట్లు కోల్పోయి 267 పరుగులు చేసింది.
ఓవర్నైట్ స్కోరు 10/0 తో బ్యాటింగ్ కొనసాగించిన ఇంగ్లాండ్ ఆరంభంలోనే జేసన్ రాయ్ (10) వికెట్ కోల్పోయింది. అప్పటికీ జట్టు స్కోరు 22 పరుగులే. అనంతరం క్రీజులోకి వచ్చిన రూట్ - బర్న్స్ జోడి మరో వికెట్ పడకుండా జాగ్రత్తగా ఆడింది. వీరిద్దరూ 132 పరుగుల భాగస్వామ్యాన్ని నెలకొల్పారు.
బర్న్స్ బర్నింగ్..
కెరీర్లో తొలి సెంచరీ నమోదు చేసిన ఇంగ్లాండ్ ఓపెనర్ రోరీ బర్న్స్ ప్రత్యర్థిపై ఆధిపత్యం చెలాయించాడు. 282 బంతుల్లో 125 పరుగులు చేసి ఆసీస్ బౌలర్ల సహనాన్ని పరీక్షించాడు. ఇందులో 16 ఫోర్లు ఉన్నాయి. ప్రస్తుతం బెన్ స్టోక్స్తో (38) కలిసి ఇన్నింగ్స్ నడిపిస్తున్నాడు. వీరిద్దరూ ఇప్పటికే 73 పరుగుల భాగస్వామ్యం నమోదు చేశారు. ఇంగ్లీష్ బ్యాట్స్మెన్ ఇలాగే ఆడితే భారీ ఆధిక్యం సాధించడం ఖాయం.
రెండు సార్లు బతికిపోయిన రూట్..
ఇంగ్లీష్ కెప్టెన్ జోయ్ రూట్ ఔట్ నుంచి రెండు సార్లు తప్పించుకున్నాడు. ఆసీస్ బౌలర్ ప్యాటిన్సన్ బౌలింగ్లో బంతి రూట్ బ్యాట్కు దగ్గరగా వెళ్లింది. శబ్దం విన్న అంపైర్ ఔట్ ఇచ్చాడు. అయితే రూట్ సమీక్ష కోరగా.. బ్యాట్ తాకనట్లుగా తేలింది. అల్ట్రా ఎడ్జ్లో వచ్చిన శబ్దం బంతి స్టంప్ను తాకినపుడు వచ్చిందని తేలింది. బెయిల్ కింద పడని కారణంగా రూట్ను అంపైర్ నాటౌట్గా ప్రకటించాడు. సిడిల్ బౌలింగ్లో అంపైర్ రూట్ను ఎల్బీడబ్ల్యూగా తేల్చాడు. మళ్లీ రివ్యూ వాడి రూట్ బతికిపోయాడు.
మొదట బ్యాటింగ్ చేసిన కంగారూ జట్టు 284 పరుగులకు ఆలౌటైంది. స్టీవ్ స్మిత్ (144) సెంచరీతో ఆదుకున్నాడు. ఇంగ్లాండ్ బౌలర్ స్టువర్ట్ బ్రాడ్ 5 వికెట్లతో విజృంభించగా.. క్రిస్ వోక్స్ 3, స్టోక్స్ ఓ వికెట్ తమ ఖాతాలో వేసుకున్నారు.
ఇది చదవండి: టీ-20: విండీస్తో భారత్ అమీతుమీ
