విరాట్ కోహ్లీ.. క్రికెట్ ప్రపంచానికి పరిచయం అక్కర్లేని పేరు. ఇప్పటికే అనేక ఘనతలు సాధిస్తూ, రికార్డులు అధిగమిస్తూ ముందుకు సాగుతున్నాడు. ధోనీ తర్వాత కెప్టెన్గా బాధ్యతలు అందుకుని, టీమిండియాను అన్మి ఫార్మాట్లలో విజయపథంలో నడిపిస్తున్నాడు. అలాంటిది.. ఒకానొక సందర్భంలో కోహ్లీని జట్టులోకి తీసుకోకుండా ధోనీ అడ్డుకున్నాడట. ఈ విషయాన్ని మాజీ సెలక్టర్ దిలీప్ వెంగ్సర్కార్ వెల్లడించాడు. ఆ సమయంలో మహీ, ప్రధాన కోచ్ కిర్స్టన్, తనకు మధ్య జరిగిన సంఘటనల్ని వివరించాడు.
"అప్పటికే అండర్-19 ప్రపంచకప్లో కోహ్లీ సత్తాచాటాడు. బ్యాట్స్మన్, కెప్టెన్గా జట్టును ముందుండి నడిపించాడు. కప్ గెలవడంలో కీలకపాత్ర పోషించాడు. విరాట్ టెక్నిక్, బ్యాటింగ్ శైలిని పరిశీలించిన నేను.. అతడు భారత జట్టుకు ఆడేందుకు అర్హుడని భావించాను. 2008లో శ్రీలంకతో జరిగిన సిరీస్లో ఎంపిక చేయాలని అనుకున్నాను. అయితే ఈ నిర్ణయాన్ని అప్పటి కోచ్ గ్యారీ కిర్స్టెన్, కెప్టెన్ ధోనీలు తప్పుబట్టారు. అతడు ఆటను మేం చూడలేదని అన్నారు. బదులుగా దేశావాళీల్లో రాణిస్తున్న బద్రీనాథ్కు అవకాశమివ్వాలని చెప్పారు. కానీ నేను నా నిర్ణయంపై కట్టుబడి కోహ్లీని జట్టులోకి తీసుకున్నా"
- దిలీప్ వెంగ్సర్కార్, భారత సెలక్షన్ కమిటీ మాజీ ఛైర్మన్
క్రికెట్లో భారత్ తరఫున వన్డేలు, టెస్టుల్లో కలిపి 70 శతకాలు చేసిన కోహ్లీ.. దిగ్గజ సచిన్ తెందుల్కర్(100), రికీ పాంటింగ్(71)ల తర్వాతి స్థానంలో ఉన్నాడు.
ఇదీ చదవండి: సారథి అయినా.. దూకుడు తగ్గదు: కోహ్లీ
