ప్రస్తుతం పాకిస్థాన్లో జరుగుతున్న సిరీస్ తర్వాత టెస్టు కెప్టెన్సీ నుంచి క్వింటాన్ డికాక్ను తప్పిస్తామని దక్షిణాఫ్రికా జట్టు కోచ్ మార్క్ బౌచర్ స్పష్టం చేశాడు. ఈ అదనపు బాధ్యత అతని బ్యాటింగ్పై ప్రభావం చూపిస్తుందని మార్క్ పేర్కొన్నాడు. తమతో టెస్టు సిరీస్ను క్రికెట్ ఆస్ట్రేలియా వాయిదా వేయడం నిరాశ కలిగించిందని అసంతృప్తి వ్యక్తం చేశాడు.
దక్షిణాఫ్రికాలో కరోనా వ్యాప్తి దృష్ట్యా ఆస్ట్రేలియా తమ పర్యటనను వాయిదా వేసుకుంది. దీంతో వచ్చే తొమ్మిది నెలల్లో మాకు టెస్టు సిరీస్లు లేవు. పాకిస్థాన్ నుంచి స్వదేశానికి తిరిగి రాగానే మాకు కొంచెం సమయం ఉంటుంది. కూర్చొని మాట్లాడుకుంటాం. టెస్టు కెప్టెన్గా ఎవరు సమర్థుడనే విషయాన్ని తేలుస్తాం. ఫలితంగా డికాక్పై ఉన్న అదనపు బాధ్యతలు తొలగిస్తాం.
-మార్క్ బౌచర్, దక్షిణాఫ్రికా కోచ్.
2020 వేసవిలో క్విన్నీని తాత్కాలిక టెస్టు కెప్టెన్గా నియమించారు.
"అది అతనిపై అదనపు భారం అవుతుంది. ప్రస్తుత పాకిస్థాన్ సిరీస్లో అతడు ఫామ్ లేమితో ఇబ్బంది పడుతున్నాడు. తొలి టెస్టు రెండు ఇన్నింగ్స్ల్లో కలిపి 15, 2 పరుగులు మాత్రమే చేశాడు. బ్యాటింగ్లో చెప్పుకోదగ్గ ప్రదర్శన చేయకపోతే అందరి దృష్టిలో పడతాం. కెప్టెన్గా ఉన్నప్పుడు అది ఇంకా ఎక్కువగా ఉంటుంది" అని బౌచర్ తెలిపాడు.
ఆసీస్ నిర్ణయంపై అసంతృప్తి..
సౌతాఫ్రికాతో టెస్టు సిరీస్ను ఆస్ట్రేలియా వాయిదా నిర్ణయాన్ని పలువురు క్రికెటర్లు తప్పుపడుతున్నారు. దీనిపై బౌచర్ స్పందించాడు. ఇది తమను తీవ్ర నిరాశకు గురి చేసిందని.. ఆర్థికంగానూ అధిక నష్టం వాటిల్లుతుందని తెలిపాడు.
ఈ సిరీస్కు ముందు మేము శ్రీలంకలో పర్యటించాం. అక్కడ హోటల్లోని బయో బబుల్లో ఉండగా కరోనా కేసు వెలుగు చూసింది. అయినప్పటికీ మేము సిరీస్ను కొనసాగించాం. ప్రస్తుతం పాకిస్థాన్తో సిరీస్ను ఆడుతూనే.. టీ20ల్లో లేని కొంత మంది ఆటగాళ్లను స్వదేశానికి పంపించాలనే ప్రణాళికలు వేసుకున్నాం. ఇవన్నీ ఆసీస్తో జరుగనున్న సిరీస్ నేపథ్యంలో తీసుకున్న నిర్ణయాలే. ఈ విషయంపై బౌలింగ్ కోచ్ చార్ల్ లాంగ్వెల్ట్, మీడియా మేనేజర్ సిపోకజి సోకనైల్తో చర్చించాను. కానీ ముందస్తు సమాచారం లేకుండా ఏకపక్షంగా ఆసీస్ ఈ నిర్ణయాన్ని తీసుకుంది.
-మార్క్ బౌచర్, దక్షిణాఫ్రికా కోచ్.
ఇదీ చదవండి: ఆసియా మిక్స్‌డ్‌ బ్యాడ్మింటన్‌ రద్దు
