అజింక్యా రహానె సెంచరీతో కరీబియన్ జట్టు ముందు భారీ లక్ష్యం ఉంచగా.. భారత పేస్ సంచలనం బుమ్రా పదునైన బంతులతో విండీస్ వికెట్లు బళ్లుమనిపించాడు. 419 పరుగుల భారీ లక్ష్యంతో రెండో ఇన్నింగ్స్ ఆరంభించిన విండీస్ భారత పేస్ దళం ధాటికి 100 పరుగులకే కుప్పకూలిపోయింది.
బుమ్రా (5/7), ఇషాంత్ (3/31), షమి (2/13) విసిరిన బంతులకు విండీస్ బ్యాట్స్మెన్ పెవిలియన్కు క్యూ కట్టారు. కోహ్లీసేన 318 పరుగుల భారీ తేడాతో ఘన విజయం సాధించింది.
బుమ్రా షో...
పిచ్ పేస్కు సహకరిస్తోన్న వేళ స్పీడ్ స్టర్ బుమ్రా చెలరేగిపోయాడు. ఇన్ స్వింగ్, ఔట్ స్వింగ్ బంతులతో విండీస్ బ్యాట్స్మెన్ను బెంబేలెత్తించాడు. మొదటి స్పెల్లో బుమ్రా వేసిన 8 ఓవర్లు మ్యాచ్కే హైలెట్. కేవలం 7 పరుగులు ఇచ్చి 5 వికెట్లు తన ఖాతాలో వేసుకున్నాడు. ఇందులో 4 వికెట్లు బౌల్డ్ కావడం విశేషం. బుమ్రాకు ఇషాంత్, షమీ సహకరించడం వల్ల భారత్ నాలుగవ రోజే మ్యాచ్ ముగించింది.
రోచ్ ఒక్కడే...
బుమ్రా దెబ్బకు విండీస్ టాప్ ఆర్డర్ పేకమేడలా కూలిపోయింది. బ్రాత్వైట్ (1), క్యాంప్బెల్ (7), డారెన్ బ్రావో (2), హోప్ (2) ఇలా ఎవరూ రెండంకెల స్కోరు చేయలేకపోయారు. వెస్టిండీస్ సారథి హోల్డర్ (8) కూడా బుమ్రా నుంచి తప్పించుకోలేపోయాడు. కీమర్ రోచ్ (38), కమిన్స్ (19*), చేజ్ (12) మాత్రమే రెండు అంకెల స్కోరు సాధించారు. శతకంతో చెలరేగిన భారత బ్యాట్స్మెన్ రహానెకు ప్లేయర్ ఆఫ్ ది అవార్డ్ దక్కింది.
రికార్డులు...
- ఇది టీమిండియాకు విదేశాల్లో పరుగుల పరంగా అతిపెద్ద టెస్ట్ గెలుపు.
- ఓవరాల్గా పరుగుల పరంగా నాలుగవ అతిపెద్ద విజయం.
- కెప్టెన్గా అత్యధిక టెస్ట్ విజయాల జాబితాలో కోహ్లీ (27), ధోని (27)తో కలసి అగ్రస్థానం పంచుకున్నాడు.
- సొంతగడ్డ వెలుపల అత్యధిక టెస్ట్ విజయాలు అందించిన టీమిండియా సారథిగా విరాట్ చరిత్రకెక్కాడు. మొత్తం 26 టెస్టుల్లో 12 విజయాలు అందించాడు. 28 టెస్టుల్లో 11 విజయాలతో గంగూలీ రెండో స్థానంలో ఉన్నాడు.
- భారత్ పేస్ బౌలర్లలో అతి తక్కువ మ్యాచ్లకే 50 వికెట్లు సాధించిన బౌలర్గా బుమ్రా రికార్డు సాధించాడు. 11 మ్యాచ్లకే 50 వికెట్ల రికార్డు కొల్లగొట్టాడు.
- భారత్తో టెస్ట్ మ్యాచ్లో ఒక ఇన్నింగ్స్లో విండీస్కు ఇదే అత్యల్ప స్కోరు.
