ఎట్టకేలకు జాతీయ డోపింగ్ నిరోధక సంస్థ(నాడా)తో భారత క్రికెట్ కంట్రోల్ బోర్డు (బీసీసీఐ) ఒప్పందం కుదుర్చుకోవడాన్ని కేంద్ర క్రీడా శాఖ మంత్రి కిరణ్ రిజుజు స్వాగతించారు. క్రికెట్లో పారదర్శకతను పెంపొందించేందుకు, అభివృద్ధికి ఈ నిర్ణయం ఉపయోగపడుతుందన్నారు.
"సమస్యలు ఉంటే నాకు నచ్చదు. వాటిని స్నేహపూర్వకంగా పరిష్కరించుకోవాలి. ఎందుకంటే ఆటల్లోనూ, ఆడేవారిలోనూ పారదర్శకత ఉండాలని నేను నమ్ముతాను" -కిరణ్ రిజుజు, కేంద్ర క్రీడా శాఖ మంత్రి
నాడా పరిదిలోకి వచ్చేందుకు బీసీసీఐ ఎప్పటినుంచో అభ్యంతరం తెలుపుతోంది. కారణం తన స్వయం ప్రతిపత్తిని కోల్పోతుందేమోనని భయం. ప్రముఖ క్రికెటర్లూ ఈ విషయంపై అడ్డు చెపుతున్నారు. వ్యక్తిగత సమాచారంతో వారి గోప్యతకు భంగం వాటిల్లే ప్రమాదం ఉందని వారి ఆందోళన.
బీసీసీఐ సీఈఓ రాహుల్ జోహ్రీ, క్రీడా సెక్రటరీ రాధే శ్యామ్ మధ్య శుక్రవారం జరిగిన భేటీ అనంతరం నాడా విషయంలో సానుకూలంగా నిర్ణయం తీసుకుంది భారత క్రికెట్ కంట్రోల్ బోర్డు.
ఈ ఒప్పందం ప్రకారం నాడా పిలిచే సమయానికి క్రీడాకారులందరూ అందుబాటులో ఉండాలి. అలా కాకపోతే నిషేధం ఎదుర్కోవాలి. ఇలాంటి చాలా విషయాలపై బీసీసీఐ ముందు వ్యతిరేకత చూపించినా చివరకు అంగీకారం తెలిపింది.
ఇదీ చూడండి: వాలీబాల్ ఫైట్: పాక్తో అమీతుమీకి భారత్ సిద్ధం
