కరోనా ప్రభావం.. ఐపీఎల్​ వాయిదాపై బీసీసీఐ స్పందన

ఐపీఎల్-2020​ వాయిదా పడుతుందనే ఊహాగానాలపై బీసీసీఐ వర్గాలు వివరణ ఇచ్చాయి. ఈ అంశంపై ఇంకా ఎలాంటి నిర్ణయం తీసుకోలేదని చెప్పాయి.

దేశంలో కరోనా వైరస్ వ్యాప్తి చెందుతున్న నేపథ్యంలో ఐపీఎల్​ వాయిదా పడే అంశంపై బీసీసీఐ వర్గాలు స్పందించాయి. టోర్నీ ప్రారంభమయ్యేందుకు ఇంకా సమయముందని, వాయిదా అంశంపై ఇంతవరకూ ఎలాంటి నిర్ణయం తీసుకోలేదని అన్నాయి. ప్రస్తుతం పరిస్థితిని సమీక్షిస్తున్నామని, అన్ని రకాల జాగ్రత్తలు తీసుకుంటామని పేర్కొన్నాయి. దీంతో ఐపీఎల్‌ 13వ సీజన్​ జరుగుతుందా? లేదా? అనే ఉత్కంఠ నెలకొంది.

షెడ్యూల్​ ప్రకారం ఈనెల 29 నుంచి ఐపీఎల్ ప్రారంభం కావాల్సి ఉంది. తొలి మ్యాచ్​ డిఫెండింగ్ ఛాంపియన్ ముంబయి ఇండియన్స్-చెన్నై సూపర్​ కింగ్స్ మధ్య జరగనుంది. ఇప్పటికే పలువురు క్రికెటర్లు ప్రాక్టీస్ మొదలుపెట్టారు.