వచ్చే ఏడాది పాకిస్థాన్లో ఆసియాకప్ జరగనుంది. ఆసియా కప్ పాక్లో జరగుతుండటం వల్ల భారత్ ఆడుతుందా లేదా? అన్న అంశంపై ఆసక్తి నెలకొంది. తాజాగా ఈ విషయంపై పాక్ క్రికెట్ బోర్డు సీఈఓ వసీంఖాన్ స్పందించారు. టీమిండియా పాల్గొనే విషయంపై బీసీసీఐకి వచ్చే జూన్ వరకు గడువు ఇచ్చినట్టు తెలిపారు.
"టీమిండియా.. ఆసియాకప్ కోసం పాకిస్థాన్కు వచ్చేందుకు అంగీకరిస్తుందో లేదో చూడాలి. వచ్చే ఏడాది సెప్టెంబరు వరకు సమయం ఉంది. జూన్ వరకు వేచి చూస్తాం. ఎందుకంటే ఈ టోర్నీ నిర్వహణలో భారత్ ప్రమేయం చాలా ఉంది. ఇక్కడ నిర్వహించాలని ఆసియా క్రికెట్ కౌన్సిల్, ఐసీసీ నిర్ణయించాయి. ఇందులో భారత్ పాల్గొంటుందని మేం ఆశిస్తున్నాం." -వసీం ఖాన్, పీసీబీ సీఈఓ
అదే విధంగా భారత్తో దైపాక్షిక సిరీస్ జరిపేందుకు ఆచరణాత్మక సమస్యలు ఉన్నాయని అంగీకరించారు ఖాన్.
"క్రికెట్ బోర్డు విషయంలో భారత్తో సత్సంబంధాలు కలిగి ఉన్నాం. కానీ టీమిండియా పాక్లో పర్యటించి, ద్వైపాక్షిక సిరీస్ ఆడాలంటే అక్కడి ప్రభుత్వం అనుమతి, తదితర అంశాలు ఉంటాయి. ఒకవేళ మాతో వారు ఆడాలనుకుంటే నిబద్ధతతో వ్యవహరించాలి. తటస్థ వేదికలో ఆడేందుకైనా మేం సిద్ధంగా ఉన్నాం". -వసీం ఖాన్, పీసీబీ సీఈఓ
చివరిసారి 2006లో పాకిస్థాన్లో పర్యటించింది భారత జట్టు. ఇందులో భాగంగా ఆడిన మూడు మ్యాచ్లు టెస్టు సిరీస్ను 1-0 తేడాతో పాక్ గెలుచుకోగా, 5 వన్డేల సిరీస్ను 4-1 తేడాతో భారత్ సొంతం చేసుకుంది.
ఇది చదవండి: క్రికెట్ తర్వాత ధోనీ చూపు అటువైపేనా..!
