ఈ ఏడాది సెప్టెంబరులో దుబాయ్ వేదికగా ఆసియాకప్ జరుగుతుందని, టీమిండియా, పాకిస్థాన్లు ఇందులో పాల్గొంటాయన్నాడు బీసీసీఐ అధ్యక్షుడు సౌరభ్ గంగూలీ. శుక్రవారం ఈ విషయంపై స్పష్టతనిచ్చాడు. ఇప్పుడిదే అంశంపై పాకిస్థాన్ క్రికెట్ బోర్డు(పీసీబీ) అధ్యక్షుడు ఎహెసన్ మణి మాట్లాడాడు. ఈ టోర్నీ గురించి తాము ఇంకా ఎటువంటి నిర్ణయం తీసుకోలేదని చెప్పాడు. ఆసియా దేశాల అసోసియేటివ్ సభ్యులతో జరిగే భేటీలో అంతిమ నిర్ణయం తీసుకుంటామని స్పష్టం చేశాడు.
"ఆసియాకప్ నిర్వహణపై అంతిమ నిర్ణయం, అసోసియేటివ్ దేశాలతో చర్చించిన తర్వాతే తీసుకుంటాం"
-ఎహెసన్ మణి, పీసీబీ అధ్యక్షుడు
పాకిస్థాన్ వేదికగా ఈ సెప్టెంబరులో ఆసియాకప్ జరగాల్సి ఉంది. భద్రతా కారణాల వల్ల కోహ్లీసేన.. ఆ దేశానికి వెళ్లేందుకు నిరాకరించింది. అందువల్ల తటస్థ వేదికలో ఈ టోర్నీని నిర్వహించాలని ఐసీసీ భావించింది. వచ్చే నెల 3న దుబాయ్లో జరగాల్సిన ఆసియా క్రికెట్ కౌన్సిల్ సమావేశంలో ఇదే విషయంపైన చర్చ జరుగుతుంది.
2012లో భారత్-పాక్ మధ్య చివరగా మ్యాచ్ జరిగింది. ఆ తర్వాత నుంచి ఒక్క పరిమిత ఓవర్ల సిరీస్ అయినా ఈ రెండు జట్ల మధ్య వీలుపడలేదు.
ఇదీ చూడండి : భారత్-పాకిస్థాన్ మ్యాచ్.. స్పష్టం చేసిన గంగూలీ
