కరోనా ప్రభావం కారణంగా ప్రపంచదేశాలు క్రీడల నిర్వహణపై మల్లగుల్లాలు పడుతున్నాయి. ఇప్పటికే చాలా టోర్నీలు వాయిదా పడ్డాయి. ఇదే సమయంలో ప్రేక్షకులు లేకుండా టోర్నీలు నిర్వహించే ప్రత్యామ్నాయం గురించి ఆలోచిస్తున్నారు. అయితే కొంతమంది ఈ నిర్ణయాన్ని వ్యతిరేకిస్తుండగా మరికొంత మంది వెనకేసుకొస్తున్నారు. అయితే ఇంగ్లాండ్ పేసర్ జోఫ్రా ఆర్చర్ ఓ సలహా ఇచ్చాడు. ప్రేక్షకుల గోలను ఆడియో రూపంలో ఏర్పాటు చేయాలంటూ చెప్పుకొచ్చాడు.
"క్రికెట్ ఆడేటపుడు మైదానంలో మ్యూజిక్ పెడుతున్నాం. అదే ప్రేక్షకుల గోలను ఆడియో రూపంలో ఎందుకు పెట్టకూడదు. చప్పట్లు, ఈలలు, అరుపుల శబ్దాల మధ్య మైదానంలో నిజమైన ప్రేక్షకుల అనుభూతిని పొందవచ్చు."
-జోఫ్రా ఆర్చర్, ఇంగ్లాండ్
కరోనా ప్రభావం కారణంగా జులై 1 వరకు క్రికెట్ సిరీస్లను రద్దు చేసింది ఈసీబీ. కానీ అక్కడ ఇంకా వైరస్ తీవ్రత తగ్గకపోవడం వల్ల టోర్నీలు ప్రారంభం కావడానికి మరికొంత సమయం పట్టేలా ఉంది.
