టీమ్ఇండియాతో జరుగుతోన్న వన్డే సిరీస్లో అద్భుత ప్రదర్శనతో ఆకట్టుకుంటున్నాడు ఇంగ్లాండ్ బ్యాట్స్మన్ జానీ బెయిర్స్టో. శుక్రవారం జరిగిన రెండో వన్డేలో సెంచరీ (112)తో అదరగొట్టి జట్టు విజయంలో కీలకపాత్ర పోషించాడు. మ్యాచ్ ముగిసిన అనంతరం తన ప్రదర్శన, ఐపీఎల్లో సన్రైజర్స్కు ఆడటం గురించి స్పందించిన ఇతడు పలు ఆసక్తికర వ్యాఖ్యలు చేశాడు. ఈసారి సన్రైజర్స్కు విజేతగా నిలిచే సత్తా ఉందని అభిప్రాయపడ్డాడు.
"ఐపీఎల్ అద్భుత టోర్నీ. ప్రతి ఒక్క అంతర్జాతీయ క్రికెటర్ ఇందులో పాల్గొనాలి అనుకుంటాడు. వచ్చే వారంలో నేను సన్రైజర్స్ జట్టుతో కలుస్తా. గతేడాది మా ప్రదర్శన సంతృప్తినిచ్చింది. ఈ ఏడాది విజేతగా నిలిచేందుకు మాకు అవకాశం ఉందని అనుకుంటున్నా. కొందరు కొత్త ఆటగాళ్లతో జట్టు ఉత్సాహంతో ఉంది."
-బెయిర్స్టో, ఇంగ్లాండ్ బ్యాట్స్మన్
అలాగే రెండో వన్డేలో సెంచరీ చేయడం పట్ల స్పందించాడు బెయిర్స్టో. ఇంగ్లాండ్ తరఫున వన్డేల్లో మరిన్ని శతకాలు సాధించాలని ఉందని వెల్లడించాడు.
"ఇంగ్లాండ్ తరఫున ఎక్కువ సెంచరీలు చేయడం నాకిష్టం. ఓపెనర్గా వచ్చినప్పటి నుంచి నా బ్యాటింగ్ తీరు సంతృప్తికరంగా ఉంది. నా గణాంకాల పట్ల సంతోషంగా ఉంది. కానీ ఈ సెంచరీలు జట్టు గెలుపు కోసం ఉపయోగపడకపోతే అవి వ్యర్థం. ప్రస్తుతం నా ఆటను ఎంజాయ్ చేస్తున్నా" అంటూ చెప్పుకొచ్చాడు బెయిర్స్టో.
భారత్-ఇంగ్లాండ్ మధ్య చివరిదైన మూడో వన్డే ఆదివారం జరగనుంది. ఇప్పటికే సిరీస్లో 1-1తేడాతో సమానంగా ఉన్న ఇరుజట్లు గెలుపు కోసం శ్రమిస్తున్నాయి.
