జనవరి 5, 1971 క్రికెట్ అభిమానులు గుర్తుంచుకోవాల్సిన రోజు. సరిగ్గా ఈరోజే ఆస్ట్రేలియా-ఇంగ్లాండ్ మధ్య తొలి వన్డే మ్యాచ్ జరిగింది. మెల్బోర్న్ వేదికగా జరిగిన ఈ మ్యాచ్ చరిత్రలో నిలిచిపోయింది. అలాగే క్రికెట్ అభిమానులకు కొత్త ఫార్మాట్ను పరిచయం చేసింది. అప్పటి నుంచి ఇప్పటివరకు వన్డే సామ్రాజ్యాన్ని ఏలిన.. ఏలుతున్న దేశాలెన్నో. నాలుగేళ్లకోసారి ప్రపంచకప్ అంటూ వచ్చిన తర్వాత ర్యాంకింగ్స్కు ప్రాముఖ్యత మరింత పెరిగింది. మొదట వెస్టిండీస్ తన ప్రాబల్యాన్ని చాటగా.. తర్వాత ఆస్ట్రేలియా అగ్రగామిగా దూసుకెళుతూ ఐసీసీ టోర్నీల్లో ఆధిపత్యం చూపించింది. 2019 ప్రపంచకప్లో గెలిచిన ఇంగ్లాండ్ కూడా ఈ ఫార్మాట్లో తనదైన ముద్ర వేసింది. అలా ఏ జట్లు వరుసగా ఎక్కువ కాలం 50 ఓవర్ల ఫార్మాట్లో అగ్రస్థానంలో ఉన్నాయో చూద్దాం.
5. భారత్ (12 నెలలు)
జనవరి 2013 నుంచి డిసెంబర్ 2013 వరకు భారత్ వన్డేల్లో అగ్రస్థానంలో ఉంది. అంటే 12 నెలలు దాదాపుగా అగ్రగామిగా కొనసాగింది. ఈ కాలంలో ఇండియా 32 మ్యాచ్లాడి 22 మ్యాచ్ల్లో గెలుపొందింది. విజయశాతం 68.75గా ఉంది. ధోనీ కెప్టెన్గా ఉన్న ఈ సమయంలో మొదట పాకిస్థాన్తో జరిగిన సిరీస్ను 2-1 తేడాతో కోల్పోయింది. కానీ తర్వాత ఇంగ్లాండ్తో జరిగిన సిరీస్ను 3-2 తేడాతో గెలుచుకుని గాడిలో పడింది. అనంతరం ఇదే ఏడాదిలో జరిగిన ఛాంపియన్స్ ట్రోఫీలో విజేతగా నిలిచింది. తర్వాత వెస్టిండీస్, జింబాబ్వే, ఆస్ట్రేలియాలతో సిరీస్లను కైవసం చేసుకుంది. బెంగళూరు వేదికగా ఆసీస్తో జరిగిన చివరిదైన ఏడో వన్డేలో రోహిత్ శర్మ (209) బాదిన డబుల్ సెంచరీ ఈ సిరీస్కు హైలెట్గా నిలిచింది. కానీ చివర్లో సౌతాఫ్రికాతో జరిగిన రెండు వన్డేల్లో ఓడి ఏడాదిని పరాజయంతో ముగించింది టీమిండియా.
4.ఇంగ్లాండ్ (14 నెలలు)
మే 2018లో అగ్రస్థానం కైవసం చేసుకున్న ఇంగ్లాండ్ తర్వాత 14 నెలల పాటు ఆధిపత్యం వహించింది. ఈ 14 నెలల్లో ఇంగ్లీష్ జట్టు మొత్తం 30 మ్యాచ్లాడి 22 మ్యాచ్ల్లో విజయం సాధించింది. విజయ శాతం 73.33గా ఉంది. జూన్ 2018లో స్కాట్లాండ్ చేతిలో ఓడిన ఈ జట్టు తర్వాత పుంజుకుంది. ఆస్ట్రేలియాపై 5-0, భారత్పై 2-1 తేడాతో సిరీస్లను కైవసం చేసుకుంది. వెస్టిండీస్తో జరిగిన సిరీస్ మాత్రం 2-2తేడాతో సమమైంది. అనంతరం 2019లో జరిగిన ప్రపంచకప్లో ఫేవరెట్లుగా బరిలోకి దిగి తొలిసారి విజేతగా నిలిచింది. ఈ మెగా టోర్నీ సమయంలో భారత్ అగ్రస్థానానికి చేరినా వెంటనే మళ్లీ ఇంగ్లాండ్ ఆ స్థానానికి చేరుకుంది.
3. దక్షిణాఫ్రికా (46 నెలలు)
మే 1996 నుంచి ఫిబ్రవరి 2000 వరకు దాదాపు నాలుగేళ్లు దక్షిణాఫ్రికా అగ్రస్థానంలో కొనసాగింది. ఈ కాలంలో సఫారీలకు ఏదైన చేదు అనుభవం ఉందంటే అది 1999 ప్రపంచకప్లో సెమీస్లో ఆస్ట్రేలియా చేతిలో ఓడిపోవడం మాత్రమే. ఈ సమయంలో సౌతాఫ్రికా మొత్తం 88 మ్యాచ్లాడి 66 మ్యాచ్ల్లో విజయం సాధించింది. విజయ శాతం 75గా ఉంది. స్వదేశంలో 36 మ్యాచ్లాడి 27 మ్యాచ్ల్లో గెలిచింది. దీనిని దక్షిణాఫ్రికా క్రికెట్లో అత్యంత విజయవంతమైన కాలంగా చెప్పుకోవచ్చు. తర్వాత ఈ జట్టు ఎన్నో ఛాలెంజస్ను ఎదుర్కొంటూ ఢీలా పడింది.
2.ఆస్ట్రేలియా (52 నెలలు)
పరిమిత ఓవర్ల క్రికెట్లో ఆస్ట్రేలియాకు గొప్ప రికార్డే ఉంది. ఐసీసీ ఈవెంట్లలో ఈ దేశానికి ఘనమైన రికార్డు ఉంది. అక్టోబర్ 2002 నుంచి జనవరి 2007 వరకు ఆసీస్ అగ్రజట్టుగా కొనసాగింది. ఈ కాలంలో కంగారూ జట్టు 123 మ్యాచ్లాడి 99 మ్యాచ్ల్లో గెలిచింది. విజయం శాతం 80.49గా ఉండటం విశేషం.
1. వెస్టిండీస్ (65 నెలలు)
ఒకప్పుడు వెస్టిండీస్ పేరు చెబితేనే ప్రత్యర్థి ఆటగాళ్లలో వణుకుపుట్టేది. 1975, 1979 ప్రపంచకప్లు గెలిచి జోరుమీదున్న కరీబియన్ జట్టు అప్పట్లో భీకరమైన ఫామ్లో ఉండేది. క్లైవ్ లాయిడ్ సారథ్యంలో ఎన్నో మరపురాని విజయాలను సొంతం చేసుకున్న ఆ జట్టు వన్డే ర్యాంకింగ్స్లోనూ తమ సత్తాచాటింది. వరుసగా 65 నెలలు అగ్రస్థానంలో కొనసాగి తమ ఆధిపత్యాన్ని చూపించింది. జనవరి 1987- మే 1992 వరకు వెస్టిండీస్ అగ్రస్థానంలో కొనసాగింది. ఈ కాలంలో 98 మ్యాచ్లాడి 76 మ్యాచ్ల్లో విజయం సాధించింది. ఎక్కువగా ఆస్ట్ల్రేలియాతో 34 మ్యాచ్లాడి 26 మ్యాచ్ల్లో గెలిచింది.
