వచ్చే ఏడాది ఐపీఎల్ కోసం అన్ని ఫ్రాంఛైజీలు ఆటగాళ్ల వేలంపై దృష్టిసారించాయి. ఇప్పటికే ట్రేడింగ్ విండో ద్వారా తమకు నచ్చిన క్రికెటర్లను అంటిపెట్టుకున్న జట్లు.. కొందరిని వదులుకున్నాయి. ఫలితంగా ప్రతి టీమ్ దగ్గర కొంత మొత్తంలో నగదు మిగిలింది. ఈనెల 19న జరిగే వేలంలో తమకు కావల్సిన వారిని దక్కించుకొనేందుకు ప్రణాళికలు రచిస్తున్నాయి. అయితే ఈసారి ముంబయి ఇండియన్స్, చెన్నై సూపర్ కింగ్స్ మాత్రం.. ముగ్గురు క్రికెటర్లను సొంతం చేసుకొనేందుకు ప్రయత్నిస్తున్నాయి. వారి కోసం పోటీపడబోతున్నాయి. వారెవరో చూద్దాం.
3. జేమ్స్ నీషమ్
న్యూజిలాండ్ జట్టులో ప్రస్తుతం అనుభమున్న ఆల్రౌండర్గా ఉన్నాడు నీషమ్. అందువల్ల వచ్చే ఐపీఎల్ సీజన్ కోసం ఇతడిని తీసుకునేందుకు జట్లు పోటీపడే అవకాశం ఉంది. చెన్నై సూపర్ కింగ్స్కు డెత్ ఓవర్లలో స్పెషలిస్ట్ బ్యాట్స్మెన్ దొరకట్లేదు. గత సీజన్లో ధోనీ.. 12 ఇన్నింగ్స్ల్లో 416 పరుగులతో ఒంటరి పోరాటం చేశాడు. ఇతడికి తోడుగా మరో బ్యాట్స్మన్ కోసం వెతుకుతోంది చెన్నై. ఇప్పుడు వీరి కళ్లు నీషమ్పై పడ్డాయి.
ముంబయి ఇండియన్స్లో ఆల్రౌండర్లు అయిన హార్దిక్ పాండ్య, బెన్ కటింగ్ గాయాలతో బాధపడుతున్నారు. కటింగ్ను వదిలేసుకున్న ముంబయి.. హార్దిక్ను అంటిపెట్టుకుంది. కానీ అతడు గాయం నుంచి ఇంకా కోలుకోలేదు. పొలార్డ్ ఒక్కడిపైనే అధిక భారం పడే అవకాశం ఉంది. అందువల్ల మరో సరైన ఆల్రౌండర్ కోసం రోహిత్సేన ప్రయత్నాలు చేస్తోంది. మిడిల్, డెత్ ఓవర్లలో పొలార్డ్కు నీషమ్ నుంచి మద్దతు లభిస్తే ముంబయికి ఢోకా ఉండదనేది వారి ఆలోచన.
2. ఇయాన్ మోర్గాన్
గత రెండు సీజన్ల్లోనూ ఆడని మోర్గాన్కు పరిమిత ఓవర్ల క్రికెట్లో మంచి పేరుంది. ఈ ఏడాది జరిగిన ప్రపంచకప్లో ఇంగ్లాండ్ను విజేతగా నిలిపిన ఇతడి కోసం ఈసారి వేలం జోరుగానే సాగనుంది. డాషింగ్ బ్యాటింగ్తో పాటు, కెప్టెన్గా అనుభవాన్ని చెన్నై, ముంబయి వాడుకోవాలని చూస్తున్నాయి. మిడిల్ ఓవర్లలో బలహీనంగా కనిపిస్తోన్న రోహిత్ సేన మోర్గాన్ కోసం బిడ్ వేసే అవకాశం ఉంది. ముంబయి లాగా మిడిలార్డర్ సమస్యతో బాధపడుతోన్న చెన్నైకు ఇతడు ఓ ఆప్షన్గా కనిపించనున్నాడు.
1. టామ్ బాంటన్
21 ఏళ్ల యువ బ్యాట్స్మన్ టామ్ బాంటన్(ఇంగ్లాండ్).. ఈ ఏడాది విటలిటీ బ్లాస్ట్ టీ20 లీగ్లో అదరగొట్టాడు. 13 మ్యాచ్ల్లో 161.47 సగటుతో 549 పరుగులు సాధించి ఔరా అనిపించాడు. ఇతడి బ్యాటింగ్కు బౌలర్ల దగ్గర సమాధానం లేకపోయింది. ఇప్పుడు ఈ క్రికెటర్ గురించి ఐపీఎల్ ఫ్రాంఛైజీలు ఆలోచిస్తున్నాయి. బాంటన్ కోసం వచ్చే సీజన్లో భారీ మొత్తంలో వెచ్చించినా ఆశ్చర్యపోవక్కర్లేదు.
చెన్నై సూపర్ కింగ్స్కు రెండు సీజన్ల నుంచి గాయాల బెడద తప్పట్లేదు. సీనియర్ బ్యాట్స్మన్ షేన్ వాట్సన్ గాయాల బారిన పడుతున్నాడు. ఫలితంగా టాపార్డర్లో ఓ యువ ఆటగాడి కోసం వెతుకుతోంది ధోనీసేన. అందుకు బాంటన్, వారికి ప్రత్యామ్నయంగా కనిపించొచ్చు. వచ్చే సీజన్ కోసం భారీ మొత్తంలో ఖర్చు చేసైనా, ఇతడిని దక్కించుకునేందుకు చెన్నై ప్రణాళికలు రచిస్తోంది.
సనత్ జయసూర్య నుంచి డికాక్ వరకు టాపార్డర్లో ఓ డాషింగ్ విదేశీ బ్యాట్స్మన్ను అంటిపెట్టుకుంటోంది ముంబయి. గత సీజన్లో ఆడిన లూయిస్ను వదులుకున్న రోహిత్సేన.. టాపార్డర్ను మరింత బలంగా చేసుకునేందుకు ఈసారి బాంటన్పై బిడ్ వేసేందుకు ప్రయత్నం చేస్తోంది. ఇప్పటికే రోహిత్, డికాక్, సూర్యకుమార్ యాదవ్లతో ఓపెనింగ్ సమస్య లేనప్పటికీ బాంటన్ వస్తే బెంచ్ స్ట్రెంత్ బలంగా మారుతుందని ముంబయి ఆలోచన.
ఇవీ చూడండి.. 'భారత్తో టెస్టు ఆడకపోవడం దురదృష్టం'
