ఉదయం వర్షం.. సాయంత్రం వెలుతురు లేమి.. ఈ ధాటికి సౌథాంప్టన్లో ఇంగ్లాండ్-పాకిస్థాన్ రెండో టెస్టులో రెండో రోజు ఆట కూడా సవ్యంగా సాగలేదు. తొలి రోజు 45.4 ఓవర్ల ఆటలో 5 వికెట్లు కోల్పోయి 126 పరుగులు చేసిన పాక్.. రెండో రోజు ఇంకో 40.2 ఓవర్లాడి 223/9తో నిలిచింది. మబ్బులు కమ్మిన వాతావరణంలో ఇంగ్లిష్‌ బౌలర్లు శుక్రవారం కూడా చక్కటి ప్రదర్శన చేసినప్పటికీ.. వికెట్‌ కీపర్‌ బ్యాట్స్మన్ మహ్మద్‌ రిజ్వాన్ (60 బ్యాటింగ్‌) పోరాటం పాక్‌ను ఆలౌట్‌ కాకుండా ఆపింది. బాబర్‌ అజామ్‌ (47; 127 బంతుల్లో 34)తో కలిసి అతను కీలక భాగస్వామ్యం నెలకొల్పాడు. ఆట ఆఖరుకు రిజ్వాన్‌కు తోడు నసీమ్‌ షా (1 బ్యాటింగ్‌) క్రీజులో ఉన్నాడు.
ఉదయం వర్షం కారణంగా ఆట గంటన్నర ఆలస్యమైంది. ఓవర్‌నైట్‌ బ్యాట్స్‌మెన్‌ అజామ్‌, రిజ్వాన్ జాగ్రత్తగా తొలి సెషన్లో వికెట్‌ పడకుండా చూసుకున్నారు. విరామానికి స్కోరు 155/5. రెండో సెషన్‌ ఆరంభం కాగానే.. అజామ్‌ను బ్రాడ్‌ (3/56) ఔట్‌ చేయడం.. యాసిర్‌ షా (5)ను అండర్సన్‌ (3/48)ను పెవిలియన్‌ చేర్చడం.. షహీన్‌ షా అఫ్రిది (0) రనౌట్‌ కావడం వల్ల పాక్ పనైపోతున్నట్లే కనిపించింది. ఓ దశలో స్కోరు 176/8. కానీ రిజ్వాన్ ఎక్కువగా స్ట్రైక్‌ తీసుకుంటూ స్కోరు పెంచే ప్రయత్నం చేశాడు. పాక్‌ను 200 దాటించాడు. 2 పరుగులే చేసిన అబాస్‌తో కలిసి అతను తొమ్మిదో వికెట్‌కు 39 పరుగులు జోడించడం విశేషం. 215 పరుగుల వద్ద తొమ్మిదో వికెట్‌ పడింది. కొన్ని నిమిషాల్లోనే వెలుతురు మందగించడం వల్ల ఆటను ఆపేశారు. మూడు టెస్టుల సిరీస్‌లో ఇంగ్లాండ్ ఇప్పటికే 1-0 ఆధిక్యంలో ఉంది.
