IPL 2022 Australia Players: ఆస్ట్రేలియా క్రికెటర్లు ఐపీఎల్ ఆడేందుకు మార్గం సుగమమైంది. ఈ ఏడాది ఐపీఎల్లో పాల్గొనేందుకు క్రికెట్ ఆస్ట్రేలియా(సీఏ) తమ ఆటగాళ్లకు నిరభ్యంతర పత్రం(ఎన్ఓసీ) మంజూరు చేసింది. దీంతో డేవిడ్ వార్నర్, పాట్ కమిన్స్, గ్లెన్ మాక్స్‌వెల్ స్టార్లు ఏప్రిల్ 6 నుంచి ఐపీఎల్కు అందుబాటులో వచ్చే అవకాశముంది.
అయితే తమ ఆటగాళ్లు వెంటనే ఐపీఎల్కు అందుబాటులో ఉండరని సీఏ వర్గాలు తెలిపాయి. పాకిస్థాన్ పర్యటన ముగిసిన తర్వాత మాత్రమే ఆటగాళ్లు తమ ఫ్రాంచైజీలకు అందుబాటులో ఉంటారని ఆ వర్గాలు స్పష్టం చేశాయి. "అవును. ఈ ఐపీఎల్ సీజన్లో మా ప్లేయర్లు పాల్గొనేందుకు ఎన్ఓసీ మంజూరు చేశాం. అయితే పాకిస్థాన్ పర్యటన ముగిసిన తర్వాతే వారు అందుబాటులో ఉంటారు" ఆ వర్గాలు పేర్కొన్నాయి.
కాగా 1998 తర్వాత తొలిసారి పాకిస్థాన్ పర్యటనకు వెళ్లనుంది ఆస్ట్రేలియా. ఈ పర్యటనలో భాగంగా మూడు టెస్టులు, మూడు వన్డేలు, ఓ టీ20 మ్యాచ్ ఆడనుంది. చివరి మ్యాచ్ ఏప్రిల్ 5న జరగనుంది.
ఐపీఎల్లో వార్నర్, మిచెల్ మార్ష్.. దిల్లీ క్యాపిటల్స్ తరఫున ఆడనుండగా, గ్లెన్ మాక్స్‌వెల్, జోష్ హేజిల్‌వుడ్ రాయల్ ఛాలెంజర్స్ బెంగళూరుకు ప్రాతినిధ్యం వహించనున్నారు. ఐపీఎల్-2022 సీజన్ మార్చి చివరి వారంలో ప్రారంభం కానుంది.
ఇదీ చూడండి: 'బిజీ షెడ్యూల్‌లో టీమ్ఇండియా.. రోహిత్‌కు అతిపెద్ద సవాలు'
