Bumrah Cape Town: టీమ్ఇండియా స్టార్ ఫాస్ట్ బౌలర్ జస్ప్రీత్ బుమ్రా అద్భుతంగా రాణిస్తున్నాడు. కేప్టౌన్ వేదికగా టెస్టుల్లో బుమ్రా అరంగేట్రం చేసి నాలుగేళ్లు పూర్తయింది. మళ్లీ అదే జట్టు(దక్షిణాఫ్రికాపై), అదే వేదికలో కీలక మ్యాచ్ ఆడనున్నాడు బుమ్రా. ఈ నేపథ్యంలో కేప్టౌన్లో తన పాత జ్ఞాపకాలను గుర్తు చేసుకున్నాడు. మంగళవారం నుంచి ఈ మ్యాచ్ ప్రారంభంకానుంది.
"2018 జనవరిలో కేప్టౌన్లో జరిగిన మ్యాచ్తో టెస్టు కెరీర్ను మొదలుపెట్టాను. నాలుగేళ్ల నుంచి ఆటగాడిగా ఎదిగాను. నాకంటూ ప్రత్యేక గుర్తింపు లభించింది. ఈ మైదానానికి తిరిగి రావడం సంతోషంగా ఉంది. పాత జ్ఞాపకాలు గుర్తుకు వస్తున్నాయి" అని బుమ్రా పేర్కొన్నాడు.
దక్షిణాఫ్రికాపై అరంగేట్ర మ్యాచ్లోనే నాలుగు వికెట్లు తీశాడు బుమ్రా. అందులో ఏబీ డివిలియర్స్ వికెట్ కూడా ఒకటి. అయితే ఆ మ్యాచ్లో భారత్ ఓడిపోయింది. తర్వాత జోహన్నెస్బర్గ్లో జరిగిన టెస్ట్ మ్యాచ్లో ఐదు వికెట్లు తీసి జట్టు విజయంలో కీలక పాత్ర పోషించాడు. ఆ సిరీస్లో మొత్తం 14 వికెట్లు తీశాడు. అప్పటి నుంచి భారత్ పేస్ దళానికి నాయకుడిగా ఎదిగాడు. ప్రతికూల పరిస్థితుల్లోనూ ప్రత్యర్థి బ్యాటర్లకు చెమటలు పట్టించే బుమ్రా.. విదేశాల్లో అత్యంత వేగంగా 100 వికెట్లు తీసిన బౌలర్గా రికార్డు సృష్టించాడు. ఇప్పటివరకు 26 టెస్టులు ఆడిన బుమ్రా.. 107 వికెట్లు దక్కించుకున్నాడు.
ఇదీ చూడండి: పంత్ ఇకనైనా ఆటతీరును మార్చుకుంటాడా?
