Brothers In Indian Cricket : క్రికెట్ ప్రపంచంలో అన్నాదమ్ముళ్లిద్దరూ జాతీయ జట్టుకు ప్రాతినిధ్యం వహించడం అనేది గొప్ప విషయం. అలా ఒకప్పుడు యూసఫ్ పఠాన్, ఇర్ఫాన్ పఠాన్ సోదరుల ద్వయం టీమ్ఇండియాకు ప్రాతినిధ్యం వహించింది. యూసఫ్, ఇర్ఫాన్.. వారి టాలెంట్, స్కిల్స్తో ఎందరో మంది అభిమానులను సంపాదించుకున్నారు. వీరిద్దరూ టీమ్ఇండియాకు అనేక విజయాలు కట్టబెట్టారు కూడా.
వీరి రిటైర్మెంట్ తర్వాత అంతటి ఉత్తమమైన ఆల్రౌండర్లుగా.. హార్దిక్ పాండ్య, కృనాల్ పాండ్య సోదరులు టీమ్ఇండియాలో ఎంట్రీ ఇచ్చారు. వీరిలో కృనాల్ అప్పుడప్పుడు జట్టుకు ఎంపిక కాగా.. హార్దిక్ ఏకంగా టీ20ల్లో కెప్టెన్గా ఎప్పుడో ప్రమోషన్ పొందాడు. ఇక వీరిద్దరి తర్వాత టీమ్ఇండియాలో మరో సోదరుల ద్వయం ఎంట్రీ ఇస్తుందా? అన్న ప్రశ్న అభిమానుల్లో రేకెత్తుతోంది. అయితే ఉత్తర్ప్రదేశ్కు చెందిన అజయ్, విజయ్ అనే సోదరులు.. వారి అద్భుత ఆటతీరుతో స్థానికంగా అందరి దృష్టిని ఆకర్షిస్తున్నారు. మరి వారి కథేంటో తెలుసుకుందాం.
ఉత్తర్ప్రదేశ్ సహరన్పుర్కు చెందిన అజయ్, విజయ్లు కవలలు. మధ్యతరగతి కుటుంబ నేపథ్యం కలిగిన ఈ సోదరులు క్రీడలపై మక్కువతో క్రికెట్ను ఎంచుకున్నారు. వీరు మేరఠ్లోని భమాషా స్టేడియంలో రోజు సాధన చేస్తుండేవారు. ఇక స్థానికంగా అనేక టోర్నమెంట్లలో అద్భుతంగా రాణించి.. యూపీ టీ20 లీగ్లో ఆడే ఛాన్స్ కొట్టేశారు. వీరిద్దరూ ఈ లీగ్లో వేర్వేరు జట్ల తరఫున ప్రాతినిధ్యం వహించారు.
'భువనేశ్వర్ స్ఫూర్తి'.. టీమ్ఇండియా స్టార్ బౌలర్ భువనేశ్వర్ కుమార్ తనకు స్ఫూర్తి అని అజయ్ ఈటీవీ భారత్తో తెలిపాడు. "మాకు భువనేశ్వర్ కుమార్, హార్దిక్ పాండ్య స్ఫూర్తి. మేమిద్దరం 2018లో మేరఠ్ భమాషా స్టేడియానికి వచ్చి ట్రైనింగ్ తీసుకునేవాళ్లం. ఈ సమయంలోనే సీనియర్ క్యాంప్ అండర్ 19లో ఆడాను. ఆ తర్వాత అనేక జాతీయ స్థాయి టోర్నీల్లోనూ పాల్గొన్నా. ఇంతటితో ఆగిపోను. రంజీ ట్రోఫీ, సయ్యద్ ముస్తక్ అలీ ట్రోఫీ ఇలా ఒక్కొ మెట్టు ఎక్కుకుంటూ టీమ్ఇండియాలో చోటు దక్కించుకోవడమే నా లక్ష్యం" అని అజయ్ అన్నాడు.
భువనేశ్వర్ కోచ్ దగ్గరే శిక్షణ.. స్వింగ్ కింగ్ భువనేశ్వర్ కోచ్ సంజయ్ రస్తోగి వద్ద నాలుగేళ్లుగా ఈ సోదరులు శిక్షణ పొందుతున్నట్లు తెలిపారు. గతేడాది స్టేట్ అండర్ 19లో 25 మ్యాచ్లు ఆడిన విజయ్.. రీసెంట్గా జరిగిన యూపీ టీ20 లీగ్లో గోరఖ్పుర్ జట్టు తరఫున 5 మ్యాచ్లు ఆడాడు. ఐదింట్లో కలిపి 6 వికెట్లు పడగొట్టి సత్తా చాటాడు. ఇక ఈ సోదరులిద్దరూ ఎంతో ప్రతిభావంతులని కోచ్ రస్తోగి కితాబిచ్చాడు. రానున్న రోజుల్లో ఈ సోదరులు భారత జట్టులోకి ఎంట్రీ ఇచ్చినా ఆశ్చర్యపోవాల్సిన పనిలేదని స్థానికులు అంటున్నారు.
