సెంచూరియన్ వేదికగా ఆదివారం ప్రారంభమయ్యే భారత్-దక్షిణాఫ్రికా 'బాక్సింగ్ డే' టెస్టు కోసం అందరూ ఆసక్తిగా ఎదురు చూస్తున్నారు. అయితే ఈ మ్యాచ్ను బాక్సింగ్ డే టెస్టు అని ఎందుకు పిలుస్తారు? దాని వెనుకున్న కథేంటి? తెలియాలంటే ఈ స్టోరీ చదవాల్సిందే.
అలా వచ్చిందా పేరు..
డిసెంబర్ 26కు, బాక్సింగ్ క్రీడకూ ఏ సంబంధమూ లేదు. బ్రిటన్, ఆస్ట్రేలియా, కెనడా, న్యూజిలాండ్ దేశాల్లో క్రిస్మస్ తర్వాతి రోజున అందరూ తమ బంధవులను, స్నేహితులను కలిసి బహుమతుల బాక్సులను అందజేస్తారు. పండగ ముగిసిన తర్వాత రోజు అంటే డిసెంబరు 26న తమ వద్ద పనిచేసే వారందరికి యజమానులు సెలవు ఇచ్చి, వారికి కానుకలను అందజేస్తారు. అలా క్రిస్మస్ ముగిసిన తర్వాతి రోజున కుటుంబ సభ్యులతో సమయాన్ని గడుపుతూ.. వారికి వచ్చిన బహుమతి బాక్సులను పరిశీలిస్తారు. అలా ఆ రోజును 'బాక్సింగ్ డే'గా పిలవడం ప్రారంభించారు.
ఇదీ చరిత్ర..
ఆస్ట్రేలియా, ఇంగ్లాండ్ మధ్య మొదటిసారి 1950లో బాక్సింగ్ డే టెస్టు జరిగింది. ఈ మ్యాచ్లో 28 పరుగుల తేడాతో ఆసీస్ విజయం సాధించింది. ఆ తర్వాత కూడా వివిధ దేశాలతో దక్షిణాఫ్రికా, ఆస్ట్రేలియా, ఇంగ్లాండ్, భారత్ బాక్సింగ్ డే టెస్టుల్లో ఆడాయి.
వాటిని కూడా అదే పేరుతో..
'బాక్సింగ్ డే' టెస్టు కేవలం దక్షిణాఫ్రికాకు మాత్రమే పరిమితం కాలేదు. న్యూజిలాండ్, ఆస్ట్రేలియాల్లోనూ ఈ మ్యాచ్లను అదే పేరుతో నిర్వహిస్తున్నారు. ఆస్ట్రేలియా-ఇంగ్లాండ్ మధ్య ఆదివారం నుంచి మొదలుకానున్న యాషెస్ మూడో టెస్టునూ బాక్సింగ్ డే టెస్టుగానే పిలుస్తున్నారు.
