బోర్డర్-గావస్కర్ ట్రోఫీలో భాగంగా ఆస్ట్రేలియాతో జరుగుతున్న తొలి టెస్టు మొదటి ఇన్నింగ్స్ ఆల్ రౌండర్ రవీంద్ర జడేజా విజృంభించాడు. ఏకంగా ఐదు వికెట్ల ప్రదర్శన చేశాడు. దీంతో ఆస్ట్రేలియా తొలి ఇన్నింగ్స్లో 177 పరుగులకు ఆలౌట్ అయింది. 174/8తో మొదటి రోజు చివరి సెషన్ ఆరంభించిన కంగారూల జట్టు మరో మూడు పరుగులు జోడించి చివరి రెండు వికెట్లను కోల్పోయింది. కాగా, టెస్టుల్లో జడేజా ఐదు లేదా అంతకంటే ఎక్కువ వికెట్లు పడగొట్టడం ఇది 11వ సారి. ఇక, అశ్విన్ మూడు, సిరాజ్, షమి తలో వికెట్ పడగొట్టారు. ఆసీస్ బ్యాటర్లను తక్కువ స్కోరుకే కట్టడి చేసిన టీమ్ఇండియా బ్యాటింగ్లో ఏ మేరకు రాణిస్తుందో చూడాలి.
ధోనీని గుర్తుచేసేలా.. ఇక ఈ మ్యాచ్లో వికెట్ కీపర్‌ బ్యాటర్‌ శ్రీకర్‌ భరత్ అరంగేట్ర టెస్టులోనే తన వికెట్ కీపింగ్‌ స్కిల్స్‌తో క్రికెట్ ప్రేమికుల్ని. అద్భుతమైన స్టంపౌట్‌తో మెరిశాడు. ఆస్ట్రేలియా బ్యాటర్‌ మార్నస్‌ లబుషేన్ను మెరుపు వేగంతో స్టంప్ చేసి పెవిలియన్‌కు చేర్చాడు. ఆసీస్ ఇన్నింగ్స్ 36 ఓవర్‌ వేసిన జడేజా బౌలింగ్‌లో ఐదో బంతికి లబుషేన్ ఫ్రంట్‌ఫుట్‌కు వచ్చి కవర్‌డ్రైవ్‌ షాట్‌ ఆడటానికి ప్రయత్నించాడు. అయితే బంతి మిస్స్‌ అయ్యి నేరుగా వికెట్ కీపర్‌ భరత్ చేతికి వెళ్లింది. బంతిని అందుకున్న భరత్ రెప్పపాటు వేగంలోనే బెయిల్స్‌ను పడగొట్టాడు. ఈ క్రమంలోనే ఫీల్డ్‌ అంపైర్‌ నితిన్‌ మీనన్‌ థర్డ్‌ అంపైర్‌కు రిఫర్‌ చేశాడు. అప్పుడు థర్డ్‌ అంపైర్‌.. లబుషేన్ను ఔట్‌గా ప్రకటించాడు. అయితే ప్రస్తుతం దీనికి సంబంధించిన వీడియో సోషల్‌ మీడియాలో వైరల్‌గా మారింది. అయితే టీమ్ఇండియా మాజీ కెప్టెన్‌ ధోనిని భరత్ గుర్తుచేశాడంటూ నెటిజన్లు కామెంట్లు చేస్తున్నారు.
అశ్విన్ రికార్డు.. ఇక సీనియర్ స్పిన్నర్‌ రవిచంద్రన్‌ అశ్విన్ టెస్టుల్లో 450 వికెట్ల మైలురాయిని అందుకున్నాడు. ఈ మ్యాచ్లో అలెక్స్‌ క్యారీని ఔట్‌ చేసిన అశ్విన్.. ఈ మార్క్ను సాధించాడు. దీంతో పలు రికార్డులు తన పేరిట లిఖించుకున్నాడు. టెస్టుల్లో అత్యంత వేగంగా 450 వికెట్లు సాధించిన భారత బౌలర్‌గా నిలిచాడు. 89 టెస్టు మ్యాచ్‌లోనే అశ్విన్ ఈ ఘనతను సాధించగా.. స్పిన్‌ దిగ్గజం అనిల్‌ కుంబ్లే 93 మ్యాచ్‌ల్లో ఈ రికార్డును అందుకున్నాడు. 2005లో ఈడెన్‌గార్డెన్స్‌ వేదికగా పాకిస్థాన్‌తో జరిగిన టెస్టులో కుంబ్లే తన 450వ వికెట్‌ను పడగొట్టాడు. అలా తాజా మ్యాచ్‌తో 18 ఏళ్ల కుంబ్లే రికార్డును అశ్విన్ బ్రేక్‌ చేశాడు.
ప్రపంచ క్రికెట్‌లో ఈ ఘనత సాధించిన రెండో బౌలర్‌గా అశ్విన్ నిలిచాడు. తొలి స్థానంలో శ్రీలంక దిగ్గజం ముత్తయ్య మురళీధరన్(80 మ్యాచ్‌లు) ఉన్నాడు. ఇంకో రికార్డు కూడా అశ్విన్ సాధించాడు. 450 వికెట్ల మార్క్ను ఆస్ట్రేలియా గ్రేట్‌ మెక్‌గ్రాత్ 23,635 బంతుల్లో సాధించి తొలి స్థానంలో నిలవగా.. అశ్విన్కు 23, 474 బాల్స్లో ఈ మార్క్ను అందుకుని రెండో స్థానంలో నిలిచాడు.
ఇదీ చూడండి: షమి దెబ్బకు గాల్లోకి ఆఫ్ స్టంప్.. షాక్ అయిన వార్నర్!
