ఇంగ్లాండ్ పర్యటనకు వెళ్లే భారత జట్టు కోసం భారత క్రికెట్ నియంత్రణ బోర్డు(బీసీసీఐ) ప్రణాళికను సిద్ధం చేసినట్లు తెలుస్తోంది. ఆటగాళ్లందరూ మే19న ముంబయిలో సమావేశమవ్వడానికంటే ముందే.. మూడు సార్లు ఆర్టీపీసీఆర్ పరీక్షలు చేయించాల్సి ఉంటుంది. వాటిల్లో నెగెటివ్ వస్తేనే ముంబయికి వెళ్లాలి.
ప్రపంచ టెస్ట్ ఛాంపియన్షిప్తో పాటు ఇంగ్లాండ్తో సుదీర్ఘ సిరీస్కు ఎంపికైన ఆటగాళ్లు.. తొలుత మూడు సార్లు ఆర్టీపీసీఆర్ పరీక్షలు చేయించుకోవాలి. వాటిలో నెగెటివ్ రిపోర్టు వస్తేనే ముంబయికి చేరుకోవాలి. అక్కడ 14 రోజుల తప్పనిసరి క్వారంటైన్లో ఉండాలి. అక్కడి నుంచి టీమ్ఇండియా జూన్ 2న ఇంగ్లాండ్కు బయల్దేరుతుంది. అని క్రికెట్ వర్గాలు పేర్కొన్నాయి.
ఇంగ్లాండ్ పర్యటనకు ఎంపికైన ఆటగాళ్లలో దాదాపు అందరూ కొవిడ్ టీకా తొలి డోసును తీసుకున్నారు. రెండో డోసును యూకే ప్రభుత్వ అనుమతితో తీసుకోనున్నారు.
ఇప్పటికే 20 మంది సభ్యులతో కూడిన భారత జట్టును ప్రకటించింది బీసీసీఐ. వారితో పాటు నలుగురు స్టాండ్ బై ఆటగాళ్లను ఎంపిక చేసింది. వారిలో ప్రసిధ్ కృష్ణ, అవేశ్ ఖాన్, అర్జాన్ వంటి ముగ్గురు ఫాస్ట్ బౌలర్లు ఉన్నారు. ఐపీఎల్ సందర్భంగా కరోనా బారిన పడిన ప్రసిధ్ ఇంకా కోలుకోలేదు.
ఇదీ చదవండి: ఎవరెస్ట్ అధిరోహకురాలిని ప్రశంసించిన కిరెన్ రిజిజు
