కరోనా కారణంగా ఆగిపోయిన ఐపీఎల్.. సెప్టెంబరు-అక్టోబరులో యూఏఈ వేదికగా జరగనుంది. సరిగ్గా అదే సమయంలో మ్యాచ్లు, సిరీస్లు ఉన్నాయని, దాంతో తమ ఆటగాళ్లు లీగ్లో పాల్గొనడం కుదరదని ఇంగ్లాండ్, బంగ్లాదేశ్ బోర్డు ఇదివరకే స్పష్టం చేశాయి. ఇప్పుడు ఆస్ట్రేలియా, వెస్టిండీస్, అఫ్ఘానిస్థాన్ క్రికెటర్లు కూడా దూరమయ్యే సూచనలు కనిపిస్తున్నాయి.
షెడ్యూల్ ప్రకారం అక్టోబరు 18 నుంచి టీ20 ప్రపంచకప్ భారత్లో జరగనుంది. అందుకోసం ప్రిపరేషన్గా పలు ద్వైపాక్షిక సిరీస్లు ఆడనున్నాయి. అయితే ఏప్రిల్-మే లో జరగాల్సిన ఐపీఎల్ మ్యాచ్లు.. కరోనా కారణంగా సెప్టెంబరు-అక్టోబరులో నిర్వహించాల్సిన పరిస్థితి ఏర్పడింది. దీంతో ఇంగ్లాండ్, బంగ్లాదేశ్ బోర్డులు తమ ఆటగాళ్లు, ఐపీఎల్లో తిరిగి ఆడేందుకు రావడం కుదరదని బీసీసీఐకి ముందే చెప్పేశాయి.
ఇటీవల ఆస్ట్రేలియా కూడా వెస్టిండీస్, ఆఫ్ఘానిస్థాన్తో త్రైపాక్షిక సిరీస్ నిర్వహించనున్నట్లు తెలిపింది. దీనివల్ల రషీద్ ఖాన్, పొలార్డ్, రసెల్, హెట్మయిర్ లాంటి ఆటగాళ్లు లీగ్లో పాల్గొనకపోవచ్చు! ఈ విషయమై బీసీసీఐకి ఎలాంటి సమాచారం లేదు. అయితే సదరు దేశాల క్రికెటర్లు లీగ్లో పాల్గొంటారని భావిస్తోంది భారత క్రికెట్ బోర్డు.
గతంలో ఐపీఎల్ రీషెడ్యూల్ మ్యాచ్ల గురించి మాట్లాడిన బీసీసీఐ కార్యదర్శి జైషా.. విదేశీ ఆటగాళ్లు ఎవరూ లేకపోయినా సరే మ్యాచ్లు జరిపి తీరుతామని స్పష్టం చేశారు. ఒకవేళ ఇది జరిగితే విదేశీ స్టార్ ఆటగాళ్లు లేకుండా మ్యాచ్లు ఆసక్తిగా ఉంటాయా అనే సందేహం వస్తోంది.
ఇవీ చదవండి:
