బోర్డర్ గావస్కర్ ట్రోఫీలో భాగంగా ఆస్ట్రేలియాతో జరుగుతున్న మూడో టెస్ట్‌లో టీమ్ఇండియా తడబడుతూ ఆడుతున్న సంగతి తెలిసిందే. ఓటమి దిశగా ముందుకెళ్తోంది. టర్నింగ్ ట్రాక్‌పై భారత బ్యాటర్లు చేతులెత్తేయడం వల్ల.. ప్రస్తుతం ప్రత్యర్థి జట్టు ఆస్ట్రేలియా ముందు 76 పరుగుల స్వల్ప లక్ష్యం మాత్రమే ఉంది. ఏదైనా అద్భుతం జరిగితే ఈ మ్యాచ్‌లో టీమ్ఇండియా గెలుస్తుంది. లేదంటే ఓటమిని నుంచి తప్పించుకోవడం కష్టమే.
అసలే ఇప్పుడు ఓ వైపు ఓటమి భయం వెంటాడుతుంటే.. మరోవైపు బీసీసీఐకి కొత్త చిక్కు వచ్చి పడింది! ఇండోర్ పిచ్ వల్ల బోర్డుకు కొత్త సమస్య ఎదురైంది. ఇప్పటికే తొలి రెండు మ్యాచ్ల పిచ్లపై విమర్శలు వచ్చిన సంగతి తెలిసిందే. ఇప్పుడు ఈ మూడో మ్యాచ్ పిచ్పై కూడా సర్వత్రా విమర్శలు వస్తున్నాయి. ఈ పిచ్పై.. తొలి రోజు ఆటలో 14 వికెట్లు నేలకూలగా.. రెండో రోజు 16 వికెట్లు పడ్డాయి. ఈ పిచ్పై బంతి యావరేజ్‌గా 4.8 డిగ్రీలు టర్న్ అయింది. అలాగే గరిష్టంగా 8.8 డిగ్రీల వరకు తిరిగింది. దీంతో ఈ పిచ్పై మాజీ క్రికెటర్లు అసహనం వ్యక్తం చేస్తున్నారు. ఆసీస్ మాజీ క్రికెటర్లు మాథ్యూ హెడెన్, ఇయాన్ చాపెల్‌తో పాటు టీమ్ఇండియా మాజీ క్రికెటర్ దిలీప్ వెంగ్‌సర్కార్ తీవ్ర అసంతృప్తి వ్యక్తం చేశారు. ఈ క్రమంలోనే ఇప్పుడు అంతర్జాతీయ క్రికెట్ కౌన్సిల్ ఐసీసీ కూడా ఈ పిచ్కు బిలో యావరేజ్ రేటింగ్ ఇచ్చే అవకాశాలు కనిపిస్తున్నాయి. ఒకవేళ ఇదే కనుక జరిగితే టీమ్ఇండియా డబ్ల్యూటీసీ పాయింట్స్‌లో కోతపడుతుంది. చూడాలి మరి ఏం జరుగుతుందో.
ఇకపోతే చాపెల్ మాట్లాడుతూ.. ఈ పిచ్కు ఐసీసీ మ్యాచ్ రిఫరీ బిలో యావరేజ్ రేటింగ్ ఇవ్వాలంటూ డిమాండ్ చేశాడు. బ్యాటర్లకు ఏమాత్రం అనుకూలంగా లేని ఇటువంటి పిచ్లను తయారు చేయకూడదంటూ మండిపడ్డాడు. పిచ్లను ఇలా తయారచేయడం వల్ల టెస్టు క్రికెట్‌ను అపహస్యం చేసినట్టు అవుతుందని పేర్కొన్నాడు.
దిలీప్ వెంగ్‌ సర్కార్ కూడా ఇదే అభిప్రాయాన్ని తెలిపాడు. "మంచి క్రికెట్‌ను వీక్షించాలనుకున్నవారికి ఇలాంటి పిచ్‌లు బాగా నిరాశను కలిగిస్తాయి. బౌలర్లు, బ్యాటర్లకు అనుకూలించేలా పిచ్లనే సిద్ధం చేయాలి. అప్పుడే బ్యాట్ బంతికి మధ్య ఆసక్తికర పోరు జరుగుతుంది. అసలు మొదటి రోజు ఆట తొలి గంటలోనే బాల్ ఆ రేంజ్లో టర్న్ అవుతే అది టెస్టు క్రికెట్‌ను అవమానించినట్టే అవుతుంది" అని విమర్శించాడు.
అందుకే ఇలాంటి పిచ్.. వాస్తవానికి ధర్మశాల వేదికగా ఈ మూడో టెస్ట్ మ్యాచ్ జరగాల్సి ఉంది. కానీ ఈ మ్యాచ్ను చివరి నిమిషంలో ఇక్కడకు మార్చారు. ఇప్పుడదే సమస్యగా మారినట్లు తెలుస్తోంది. సాధారణంగా ఓ టెస్ట్ మ్యాచ్‌కు పిచ్ సిద్ధం చేయాలంటే కనీసం నెల రోజుల సమయం పడుతుంది. కానీ ఇండోర్ వేదికగా రీసెంట్గా రంజీ మ్యాచ్‌లు నిర్వహించడం.. చివరి నిమిషంలో ఇదే వేదికకు మూడో టెస్ట్ మ్యాచ్ను తరలించడంతో క్యూరేటర్‌కు పిచ్ను సిద్ధం చేసేందుకు తగిన సమయం దొరకలేదు. అందుకే ఇలాంటి వికెట్ను తయారు చేయాల్సి వచ్చిందని మధ్యప్రదేశ్ క్రికెట్ అసోసియేషన్ వర్గాలు చెబుతున్నాయి.
ఇదీ చూడండి: లైయన్ స్పిన్ పంజా.. భారత్ ఆలౌట్.. ఆసీస్ టార్గెట్ ఎంతంటే?
