చైనాలో జరగనున్న ఆసియన్ గేమ్స్ 2023కి భారత క్రికెట్ జట్లను పంపించలేమని భారత క్రికెట్ నియంత్రణ మండలి (బీసీసీఐ) తెలిపింది. ఇది వరకే ఉన్న ఫ్యూచర్ టూర్ ప్రోగ్రామ్ కమిట్మెంట్స్ కారణంగా ఈ నిర్ణయం తీసుకున్నట్లు తెలిపింది. ఈ మేరకు ఓ ప్రకటన విడుదల చేసింది. కామన్‌వెల్త్‌ గేమ్స్ క్రికెట్ ప్రవేశపెట్టిన తరహాలో ఆసియన్ గేమ్స్‌లో కూడా ఈసారి క్రికెట్‌ను ప్రవేశపెట్టారు. ఆసియన్ క్రీడలు సెప్టెంబర్ 23 నుంచి అక్టోబర్ 8 వరకు చైనాలో జరగనున్నాయి. బీసీసీఐ తీసుకున్న నిర్ణయంపై.. ఇండియా ఆసియన్ గేమ్స్ చీఫ్‌ భుపేందర్‌ భజ్వా స్పందించారు. ఈసారి ఆసియన్ గేమ్స్‌లో అన్ని విభాగాల్లో ఎంట్రీ పేర్లు ఇచ్చామని.. కానీ బీసీసీఐ నిర్ణయం మేరకు క్రికెట్‌లో ఇవ్వలేదని చెప్పారు.
అయితే ఇదే విషయంపై బీసీసీఐ స్పందించింది. ఆసియన్ గేమ్స్ డెడ్లైన్కు ఒక రోజు ముందు తమకు ఐఓఏ (ఇండియన్ ఒలింపిక్ అసోసియేషన్) నుంచి మెయిల్ వచ్చిందని తెలిపింది. అప్పటికే ఫ్యూచర్ టూర్ ప్రోగ్రామ్లో భాగంగా భారత క్రికెట్ పురుషుల, మహిళల జట్ల షెడ్యూల్ పూర్తైందని చెప్పింది. ఆసియన్ గేమ్స్ సమయంలో ముఖ్యమైన మ్యాచ్లు ఉన్నాయని వెల్లడించింది. ఫ్యూచర్ ప్రోగ్రామ్స్లో భాగంగా.. స్వదేశంలో జరగనున్న వన్డే వరల్డ్ కప్లో టీమ్ఇండియా జట్టు ఆడనుంది. ఆ సమయంలోనే మహిళల క్రికెట్ టీమ్ దక్షిణాఫ్రికా, న్యూజిలాండ్తో మ్యాచ్లు ఆడనుంది. ఆసియన్ గేమ్స్ కూడా ఈ టైమ్లోనే జరుగుతుండటం వల్ల బీసీసీఐ ఈ నిర్ణయం తీసుకుంది.
ఒకవేళ ఆసియన్ గేమ్స్‌లో టీమ్ఇండియా పాల్గొనాలనుకుంటే బీసీసీఐకి ఒక దారి ఉంది. అయితే మహిళల క్రికెట్‌కు అవకాశం లేదు. కానీ పురుషుల జట్టు ఆడేందుకు ఆస్కారం ఉంది. వన్డే వరల్డ్ కప్లో సీనియర్‌ జట్టు ఆడుతుంది. కాబట్టి ఆసియన్ గేమ్స్‌కు టీమ్ఇండియా జూనియర్‌ జట్టును పంపిస్తే బాగుంటుందని క్రీడా విశ్లేషకులు అభిప్రాయం వ్యక్తం చేస్తున్నారు. ఇలా చేయడం ఇదేం మొదటి సారి కాదు.
1998లో మలేసియా రాజధాని కౌలలంపుర్లో జరిగిన కామన్‌వెల్త్‌ గేమ్స్‌లో టీమ్ఇండియా పురుషుల జట్టు ఆడింది. అప్పుడే పాక్తో టొరంటో వేదికగా జరిగిన మరో మ్యాచ్లో భారత జట్టు వన్డే సిరీస్‌ను ఆడింది. 2021లోనూ టీమ్ఇండియా సీనియర్‌ జట్టు ఇంగ్లాండ్‌లో టెస్టు మ్యాచ్ ఆడేందుకు వెళ్లింది. ఆ సమయంలో శిఖర్‌ ధావన్‌ సారథ్యంలోని జూనియర్‌ టీమ్ శ్రీలంకతో జట్టుతో వన్డే సిరీస్‌ ఆడింది. అప్పుడు ఈ ప్లాన్ వర్కవుట్ అయింది. దీంతో ఈసారి ఆసియన్ గేమ్స్‌లో కూడా ఇలాంటి ప్లాన్ అమలు చేస్తే బాగుంటుందని అభిమానులు అభిప్రాయపడుతున్నారు.
