Asia Cup 2023 : వచ్చే ఏడాది జరిగే ఆసియా కప్ కోసం భారత జట్టు పాకిస్థాన్ వెళ్లనుందనే ఊహాగానాలు వెల్లువెత్తాయి. వీటన్నిటికీ తెరదించుతూ బీసీసీఐ కార్యదర్శి జై షా కీలక వ్యాఖ్యలు చేశారు. టీమ్ ఇండియా పాకిస్థాన్లో పర్యటించబోదని స్పష్టం చేశాడు. ఆసియా కప్ కూడా పాకిస్థాన్లో జరగదని.. తటస్త వేదికలో జరుగుతుందని పేర్కొన్నారు. మంగళవారం ముంబయిలో జరిగిన సర్వసభ్య సమావేశంలో(ఏజీఎం) షా ఈ వ్యాఖ్యలు చేశారు.
"2023 ఆసియా కప్ తటస్త వేదికలో జరుగుతుంది. పాకిస్థాన్లో భారత్ పర్యటన చేయాలా లేదా అనే విషయం ప్రభుత్వం నిర్ణయిస్తుంది. దానిపై మేము కామెంట్లు చేయదలచుకోలేదు. దీంతో పాటు 2025 లో జరగబోయే ఛాంపియన్షిప్ ట్రోఫీ వేదిక కుడా నిర్ణయించలేదు. వేదిక నిర్ణయించాక దాని వివరాలు వెల్లడిస్తాం. మీడియా హక్కుల వల్ల మాకు మంచి ఆదాయం వస్తోంది. ఈ ఆదాయం వల్ల దేశీయ ప్లేయర్లకు మంచి జరగాలన్నదే మా ఉద్దేశం" అని జై షా అన్నారు.
అయితే 2023లో ఆసియా కప్ టోర్నమెంట్ పాకిస్థాన్లో జరగాలి. కానీ కొన్ని కారణాల వల్ల తటస్త వేదకలో జరుగుతుంది. దీని కారణంగానే భారత జట్టు పాకిస్థాన్లో పర్యటిస్తుందనే ఊహాగానాలు వచ్చాయి. తాజాగా జైషా ఆ ఊహాగానాలకు తెరదించారు. కాగా, మంగళవారం ముంబయిలో జరిగిన సర్వసభ్య సమావేశంలో(ఏజీఎం) కొత్త కార్యవర్గ సభ్యులను ఎన్నుకుంది బీసీసీఐ. రోజర్ బిన్నీ అధ్యక్షుడిగా, జై షా కార్యదర్శిగా ఎన్నికయ్యారు. జై షా బీసీసీఐ కార్యదర్శితో పాటు ఆసియన్ క్రికెట్ కౌన్సిల్ అధ్యక్షుడిగానూ ఉన్నారు. కాగా, గత మూడేళ్లలో బీసీసీఐ ఆదాయం రూ.3648 కోట్ల నుంచి రూ.9629 కోట్లకు చేరిందని బీసీసీఐ కోశాధికారిగా వ్యవహరించి, ఐపీఎల్ కొత్త ఛైర్మన్గా ఎన్నికైన అరుణ్ ధుమాల్ వెల్లడించారు. ఇది మూడు రెట్లు ఎక్కువ అని అన్నారు. రాష్ట్ర విభాగాలకు ఇచ్చే ఆదాయంలో ఐదు రెట్లు పెరుగుదల ఉందన్నారు.
ఇవీ చదవండి : చిన్న టీమ్ల పెద్ద దెబ్బ.. ఛాంపియన్లకు వరుస షాక్లు.. బహుపరాక్!
