Best Ways To Reuse Old Socks : పాదాలు వెచ్చగా ఉండడం కోసం.. అలాగే హాని కలగకూడదని రోజూ రంగురంగుల సాక్సులను పిల్లలకు వేస్తుంటారు తల్లిదండ్రులు. కానీ, వారు ఎదిగే కొద్దీ అవి ఉపయోగపడకపోవచ్చు. ఎన్నో డబ్బులు పోసి కొన్నవాటిని పారేయడానికి మనసు రాదు. అలాంటప్పుడు కొన్ని టిప్స్ పాటిస్తే వాటిని ఎంచక్కా సద్వినియోగం చేసుకోవచ్చంటున్నారు నిపుణులు. ఆ చిట్కాలు మీ కోసం..
- వంట చేసే పాత్రలకు ఉండే హ్యాండిల్స్‌ త్వరగా వేడెక్కుతుంటాయి. కాబట్టి, ఈసారి వాటికి ఇంట్లోని సాక్స్‌ని చుట్టేయండి. దీంతో పట్టుకోవడం తేలిక అవుతుంది. అలాగే చెయ్యి కూడా కాలకుండా ఉంటుందని అంటున్నారు.
- జర్నీ చేసేటప్పుడు నగలు వంటివాటిని నేరుగా పెట్టెలోనో, బ్యాగులోనో పెట్టేయకుండా సాక్సుల్లో ఉంచి సర్దండి. దీనివల్ల విరిగిపోకుండా ఉంటాయి. అవనే కాదు ఖరీదైన క్రిస్టల్‌ వస్తువులూ, గ్లాసులూ వంటి వాటిని దాచిపెట్టేటప్పుడు సాక్సుల్లో ఉంచితే వాటి అంచులు విరిగిపోకుండా జాగ్రత్త పడవచ్చంటున్నారు.
- ఇంట్లో డైనింగ్ టేబుల్, బీరువాలు వంటి ఫర్నిచర్‌ని ఒక చోటు నుంచి మరొకచోటుకి కదిలించేముందు వాటి కాళ్లకు సాక్సులు తొడిగితే నేలపై గీతలు పడకుండా చూసుకోవచ్చని వివరిస్తున్నారు.
- షూలను పాలిష్ చేయడానికి కూడా పాత సాక్సులను వాడుకోవచ్చు. పాలిష్ చేసిన తర్వాత సాక్సుతో ఒకసారి రుద్దితే షూస్ తళతళా మెరిసిపోతాయి.
- చిన్న చిన్న వస్తువులను సాక్సుల్లో భద్రపర్చుకోవడం వల్ల అవి ఎక్కడో పడిపోతాయన్న భయం ఉండదు.
- ఆకర్షణీయమైన రంగుల్లో ఉన్న సాక్సు కట్ చేసి అందులో గుండ్రని రాయి ఉంచి కుట్టేస్తే అందమైన పేపర్ వెయిట్ తయారైపోతుంది.
- చాలా మంది ఇంట్లో బ్యాడ్స్మెల్ పోగొట్టేందుకు పాట్‌పౌరీని వాడుతుంటాం. వాటిని గాజు పాత్రల్లోనే కాదు.. ఇలా వాడని సాక్సుల్లో వేసి ఇంట్లోని మూలల్లో పెట్టేయొచ్చు. దుస్తుల బీరువాలో నాఫ్తలీన్‌ గోళీలనూ నేరుగా వేయకుండా సాక్సుల్లో ఉంచితే సరిపోతుంది. దీంతో మరకలు పడకుండా ఉంటాయి.
- కొన్ని రకాల కొత్త వస్తువులు కొన్నప్పుడు సిలికా బ్యాగులు వస్తాయి. వాటన్నింటినీ ఒక సాక్సులో వేసి మూటకట్టి కిటికీ దగ్గర వేలాడదీయండి. ఇవి ఇంట్లోకి ఎక్కువ తేమను రానీయకుండా కొంతవరకు అడ్డుకుంటాయి.
- సాక్సుల్లో కొద్దిగా దూదిని నింపి చిన్న గలేబుల(దిండు) మాదిరిగా తయారుచేయండి. కంప్యూటర్‌ కీబోర్డుని వాడుతున్నప్పుడు చేతి మణికట్టు ఆనే చోట.. వీటిని ఉంచితే అక్కడ మచ్చలు పడకుండా ఉంటాయట
- చాలామంది ఇంటిని వీలున్నప్పుడల్లా తడిగుడ్డ పెట్టి తుడుస్తుంటారు. అలాగే, కిటికీ అద్దాల పైన పడిన మరకలను తడిగుడ్డతోనే తుడుస్తారు. ఇలా కాకుండా కిటికీలను సాక్సులతో శుభ్రం చేసుకోవచ్చు. ఒకవేళ కిటికీ పైభాగం మీకు అందకపోయినా సాక్సును కర్రకు తగిలించి, తుడుచుకోవచ్చు.
- అలాగే సాక్సులతో పిల్లలకు రకరకాల బొమ్మలు తయారుచేసి ఇవ్వచ్చు. చిన్న బొమ్మలకు దుస్తులు కూడా కుట్టచ్చు.
ఇవి కూడా చదవండి :
కూరగాయల తొక్క తీసుకోవడమే కాదు - ఇంట్లోనే కత్తులను పదును పెట్టుకోవచ్చు - ఈ కిచెన్ టూల్స్ చూశారా?
ఇంట్లో పిల్లల కోసం ఈ చిన్న ఫర్నిచర్ ఉంటే - తరచూ ఇల్లు ఖాళీ చేయాల్సిన పనిలేదు!
