యాపిల్ యూజర్లకు అలర్ట్- వెంటనే ఆ పని చేయకుంటే మీ సొమ్ము గోవిందా..!

యాపిల్ యూజర్లకు కేంద్రం హైరిస్క్ అలర్ట్!- వెంటనే ఇలా చేస్తే సేఫ్..!

High Risk Warning for Apple Users: యాపిల్ యూజర్లకు అలర్ట్. సైబర్ నేరాలు విపరీతంగా పెరుగుతున్న తరుణంలో కేంద్ర ప్రభుత్వానికి చెందిన ఇండియన్ కంప్యూటర్ ఎమర్జెన్సీ రెస్పాన్స్ టీమ్ (CERT-In) ఐఫోన్, ఇతర యాపిల్ డివైజ్​ల వినియోగదారులకు హెచ్చరికలు జారీ చేసింది. ముఖ్యంగా పాత సాఫ్ట్​వేర్ వెర్షన్​తో పనిచేసే డివైజ్​లకు ఈ అలర్ట్ ప్రకటించింది.

ఐఫోన్, ఐప్యాడ్, మ్యాక్ వంటి వాటిని వినియోగించే వారు జాగ్రత్తగా ఉండాలని హెచ్చిరించింది. వీటిలో తీవ్రమైన భద్రతా లోపాలను గుర్తించినట్లు తెలిపింది. ఇవి సైబర్ నేరాలను ప్రోత్సహించేలా ఉన్నాయని పేర్కొంది. దీంతో తమ డివైజ్​లను వెంటనే అప్డేట్ చేసుకోవాలని ఎలక్ట్రానిక్స్ ఐటీ మంత్రిత్వ శాఖ పరిధిలోని ఇండియన్ కంప్యూటర్ ఎమర్జెన్సీ రెస్పాన్స్ టీమ్ సూచించింది.

ఏ డివైజ్​​లకు ఈ హెచ్చరిక?: యాపిల్ పాత సాఫ్ట్​వేర్ వెర్షన్​తో పనిచేసే డివైజ్​లకు ఈ హెచ్చరికలు. ఐఫోన్, ఐప్యాడ్, మ్యాక్, సఫారీ వంటి ప్రొడక్ట్స్​ ఈ లిస్ట్​లో ఉన్నాయి.

• iOS: 18.1.1 కంటే పాత వెర్షన్స్
• iPadOS: 17.7.2 కంటే పాత వెర్షన్స్
• macOS: 15.1.1 కంటే పాత వెర్షన్స్
• సఫారి: 18.1.1 కంటే పాత వెర్షన్స్

వీటిలో మీ వద్ద ఉన్న యాపిల్ డివైజ్​ పాత వెర్షన్​తో రన్ అవుతున్నట్లయితే అది సైబర్ బెదిరింపులకు గురయ్యే అవకాశం ఉంది.

వెంటనే అప్​డేట్ చేయండి: CERT-In నివేదిక ప్రకారం.. యాపిల్ డివైజెస్​లోని పాత సాఫ్ట్​వేర్​లో కొన్ని బగ్స్ గుర్తించారు. ఇది సైబర్ మోసాలను ప్రోత్సహిస్తుంది. ఈ యాపిల్ ఉత్పత్తులు వాడుతున్న యూజర్ల అనుమతి లేకుండానే హ్యాకర్లు.. వారి డివైజెస్​ను హ్యాక్ చేసే అవకాశం ఉంది. దీంతో డేటా మొత్తం చోరీ అయ్యే అవకాశం ఉంది. ఈ నేపథ్యంలో వినియోగదారులు తమ డివైజెస్​ను వెంటనే తాజా వెర్షన్‌కి అప్‌డేట్ చేసుకోవాలని సూచిస్తోంది. ఒకవేళ మీ డివైజెస్​కు సాఫ్ట్‌వేర్ అప్‌డేట్ అందుబాటులో లేకుంటే మీరు కొత్త పరికరాన్ని కొనుగోలు చేయడం మంచిది.

అప్​డేట్ చేయడం ఎలా?: మీ ఐఫోన్​ను అప్​డేట్ చేయాలనుకుంటే ఇలా ఈజీ స్టెప్స్​ ఫాలో అవ్వండి.

• Settings: మొదట మీ ఐఫోన్​లో 'Settings'​ యాప్‌ను ఓపెన్ చేయండి.
• General: అందులో 'General' ఆప్షన్​పై క్లిక్ చేయండి.
• Software Update: ఇప్పుడు 'Software Update' ఆప్షన్​ను సెలెక్ట్ చేసుకోండి.
• Download and Install: మీ ఐఫోన్​కు అప్​డేట్ అందుబాటులో ఉంటే దాన్ని డౌన్‌లోడ్ చేసి ఇన్‌స్టాల్ చేయండి.
• అంతే ఇలా సింపుల్​గా మీ ఐఫోన్​ను అప్​డేట్ చేసుకోవచ్చు.