సౌథాంప్టన్ వేదికగా భారత్-న్యూజిలాండ్ మధ్య టెస్టు ఛాంపియన్ షిప్ ఫైనల్ జరగనుంది. జూన్ 18-22 వరకు ఈ మ్యాచ్ నిర్వహించనున్నారు. అయితే కరోనా దృష్ట్యా ఈ మ్యాచ్కు ప్రేక్షకుల్ని అనుమతిస్తారా? లేదా? అన్న విషయమై కొన్ని అనుమానాలు ఉండేవి. తాజాగా హాంప్షైర్ కౌంటీ క్లబ్ ఈ విషయంపై స్పష్టతనిచ్చింది. ఈ మ్యాచ్కు 4 వేల మంది ప్రేక్షకులకు అనుమతి ఇస్తామని తెలిపారు క్లబ్ హెడ్ రోడ్ బ్రన్స్గ్రోవ్.
యూకేలో కరోనా విజృంభణ కాస్త కుదుటపడింది. దీంతో హాంప్షైర్ వేదికగా ప్రారంభమైన కౌంటీ మ్యాచ్కు 1500 మంది ప్రేక్షకులకు అనుమతిచ్చారు. ఈ వేదికగానే డబ్ల్యూటీసీ ఫైనల్ జరగనుంది.
"హాంప్షైర్ వేదికగా నాలుగు రోజుల కౌంటీ మ్యాచ్ ఈరోజు నుంచి జరగనుంది. ఈ మ్యాచ్ కోసం ప్రేక్షకులకు అనుమతి ఇస్తున్నాం. 2019 సెప్టెంబర్ తర్వాత ఫ్యాన్స్ను అనుమతించడం ఇదే తొలిసారి. రేపటి నుంచి మరికొన్ని మ్యాచ్లు మొదలవుతాయి. వాటికీ ప్రేక్షకులు వస్తారు. డబ్ల్యూటీసీ ఫైనల్ కోసం ఐసీసీ స్పాన్సర్లు, వాటాదారులకు 50 శాతం వరకు టికెట్లు పోగా.. మరో 2000 టికెట్లను అమ్మకానికి ఉంచుతాం. ఇప్పటికే చాలామంది ఈ టికెట్లపై ఆసక్తి చూపిస్తున్నారు. ఈ మ్యాచ్కు చాలా డిమాండ్ ఉంది."
-రోడ్ బ్రన్స్గ్రోవ్, హాంప్షైర్ క్లబ్ హెడ్
ఈ సిరీస్ కోసం జూన్ 2న ఇంగ్లాండ్ బయలుదేరనుంది టీమ్ఇండియా. అంతకంటే ముందు రెండు వారాల పాటు ముంబయిలో క్వారంటైన్లో ఉండనున్నారు. మళ్లీ ఇంగ్లాండ్ చేరుకున్నాక మరో 10 రోజులు సౌథాంప్టన్లో క్వారంటైన్కు వెళ్లనున్నారు.
