Ajaz Patel POTM: ప్రతి నెల అత్యుత్తమ ప్రదర్శన కనబర్చిన ఆటగాళ్లను ప్రోత్సహించేందుకు 'ప్లేయర్ ఆఫ్ ది మంత్' పేరిట అవార్డు అందిస్తోంది అంతర్జాతీయ క్రికెట్ మండలి. తాజాగా డిసెంబర్ నెలకుగానూ ఈ అవార్డు గ్రహీతను ప్రకటించింది. న్యూజిలాండ్ స్పిన్నర్ అజాజ్ పటేల్ ఈ అవార్డు దక్కించుకున్నట్లు తెలిపింది. టీమ్ఇండియా ఓపెనర్ మయాంక్ అగర్వాల్, ఆస్ట్రేలియా పేసర్ మిచెల్ స్టార్క్తో పోటీపడి ఇతడు ఈ పురస్కారాన్ని దక్కించుకున్నాడు.
భారత్-న్యూజిలాండ్ మధ్య ఇటీవల జరిగిన ముంబయి టెస్టులో 14 వికెట్లతో రెచ్చిపోయాడు అజాజ్ పటేల్. ఒకే ఇన్నింగ్స్లో పది వికెట్లు పడగొట్టి.. ఈ ఘనత సాధించిన మూడో క్రికెటర్గా నిలిచాడు. తద్వారా అనిల్ కుంబ్లే, జిమ్ లేకర్ వంటి దిగ్గజ స్పిన్నర్ల సరసన చేరాడు.
