మాజీ క్రికెటర్ ఏబీ డివిలియర్స్ తిరిగి క్రికెట్లోకి పునరాగమనం చేస్తాడంటూ వస్తున్న ఊహాగానాలపై దక్షిణాఫ్రికా క్రికెట్ బోర్డు స్పష్టతనిచ్చింది. రిటైర్మెంట్ విషయంలో అతడి నిర్ణయం మారదని తేల్చి చెప్పింది. వీడ్కోలు అంశంపై తమతో కూడా మాట్లాడాడని వెల్లడించింది. ఈ ఏడాది భారత్ వేదికగా జరగనున్న టీ20 ప్రపంచకప్కు ముందు ఏబీ.. తిరిగి జట్టులోకి వస్తాడని కొద్దిరోజులుగా ఊహాగానాలు వినిపిస్తున్న నేపథ్యంలో.. బోర్డు ఇలా పైవ్యాఖ్యలు చేసింది.
వెస్టిండీస్తో రెండు టెస్టులు, 5 టీ20ల కోసం జట్టును ప్రకటించిన అనంతరం దక్షిణాఫ్రికా బోర్డు ఈ ప్రకటన చేసింది. మే 2018లో డివిలియర్స్ అంతర్జాతీయ క్రికెట్కు వీడ్కోలు ప్రకటించాడు. ప్రోటీస్ జట్టు తరఫున 114 టెస్టులతో పాటు 228 వన్డేలు, 78 టీ20ల్లో ప్రాతినిధ్యం వహించాడు.
ఐపీఎల్ 14వ సీజన్లో భాగంగా రాయల్ ఛాలెంజర్స్ బెంగళూరుకు ఆడిన డివిలియర్స్.. ఆకట్టుకునే ప్రదర్శన చేశాడు. చెన్నై వేదికగా జరిగిన ఓ మ్యాచ్లో ఆర్సీబీని గెలిపించిన అనంతరం తిరిగి క్రికెట్ పునరాగమనం చేయాలనుకుంటున్నట్లు అభిప్రాయపడ్డాడు. సౌతాఫ్రికా కోచ్ బౌచర్తో సంప్రదింపులు జరుపుతున్నట్లు తెలిపాడు ఏబీ.
ఇదీ చదవండి: ఆ ఆస్ట్రేలియా ప్లేయర్ల ఖర్చులన్నీ బీసీసీఐవే!
