6 balls 6 wickets : క్రికెట్‌లో ఎప్పుడు ఏం జరుగుతుందో ఎవ్వరూ ఊహించలేం. ఒక్కోసారి గెలుస్తుందనుకున్న జట్టు ఓటమిపాలైతే.. మరోసారి ఇక ఓడిపోతుంది అనుకున్నజట్టు అనుహ్యంగా గెలిచి అందరినీ అబ్బురపరుస్తుంది. ఆస్ట్రేలియాలోని ఓ క్లబ్ క్రికెట్‌లో జరిగిన మ్యాచ్లో ఇలాంటి ఘటనే జరిగింది. ఇక ఓటమి ఖాయమనుకున్న సమయంలో ఓ బౌలర్ ఒకే ఓవర్లో ఆరు వికెట్లు పడగొట్టి జట్టును విజయ తీరాలకు చేర్చాడు.
అసలేం జరిగిందంటే ?
గోల్డ్ కోస్ట్ ప్రీమియర్ లీగ్ డివిజన్ 3 పోటీల్లో ఈ అరుదైన ఫీట్ జరిగింది. సర్ఫర్స్ ప్యారడైజ్ జట్టుపై ముద్గీరాబా నెరంగ్ & డిస్ట్రిక్ట్స్ టీమ్‌ నాలుగు పరుగుల తేడాతో విజయం సాధించింది. 40 ఓవర్లలో 178 పరుగుల లక్ష్యంతో రంగంలోకి దిగిన సర్ఫర్స్ ప్యారడైజ్ జట్టు 39 ఓవర్లకు 174/4 స్కోరుతో నిలిచింది.
ఇక ఆరు బంతుల్లో ఐదు పరుగులు చేస్తే ఆ జట్టు విజయం సాధిస్తుంది. సరిగ్గా అదే సమయంలో ముద్గీరాబా నెరంగ్ కెప్టెన్ గారెత్ మోర్గాన్ రంగంలోకి దిగాడు. చివరి ఓవర్లో బాల్ పట్టి ఒక్క పరుగూ ఇవ్వకుండా ఏకంగా ఆరు వికెట్లు పడగొట్టాడు. ఈ క్రమంలో ఎవరూ ఊహించనివిధంగా మ్యాచ్‌ను మలుపు తిప్పాడు. ఈ దెబ్బతో సర్ఫర్స్ ప్యారడైజ్ జట్టు ఆలౌట్‌ కాగా.. ముద్గీరాబా నెరంగ్ జట్టు నాలుగు రన్స్‌ తేడాతో విజయం సాధించింది. చివరి ఓవర్లో ఔటైన వారిలో మొదటి నలుగురు బ్యాటర్లు మాత్రం క్యాచ్‌ ఔట్‌ కాగా.. మిగతా ఇద్దరు క్లీన్‌బౌల్డ్ అయ్యారు. ఈ మ్యాచ్లో గారెత్.. ఏడు ఓవర్లు వేసి 7/16 గణాంకాలు నమోదు చేశాడు. ఒకే ఓవర్లో ఆరు వికెట్లు పడగొట్టడానికి ముందు సర్ఫర్స్ ప్యారడైజ్ ఓపెనర్ జేక్ గార్లాండ్‌ని ఔట్‌ చేశాడు. అయితే ఈ మ్యాచ్లో గారెత్.. బౌలింగ్లోనే కాకుండా బ్యాటింగ్‌లోనూ రాణించాడు. 39 పరుగులు చేసి జట్టులో టాప్ స్కోరర్‌గానూ నిలిచాడు.
అయితే ఈ అరుదైన ఫీట్ను పోలిన ఘటనలు క్రికెట్ చరిత్రలో జరిగాయట. పలు నివేదికల్లో వెలువడిన సమాచారం ప్రకారం.. ప్రొఫెషనల్ క్రికెట్‌లో ఇదివరకు కొంతమంది ఒకే ఓవర్లో ఐదు వికెట్లు పడగొట్టారు. 2011లో వెల్లింగ్టన్‌పై ఒటాగో తరఫున న్యూజిలాండ్‌కు చెందిన నీల్ వాగ్నర్, 2013లో అభానీ లిమిటెడ్‌పై యూసీబీ- బీసీబీ XI తరఫున బంగ్లాదేశ్ అల్ అమీన్ హోస్సేన్ ఒకే ఓవర్లో ఐదు వికెట్లు తీశారు. మరోవైపు భారత్‌ విషయానికొస్తే.. కర్ణాటక తరఫున 2019లో అభిమన్యు మిథున్‌ అనే ప్లేయర్.. హరియాణా జట్టుపై ఈ ఘనత సాధించాడు.
