ఉత్కంఠభరితంగా సాగిన రెండో టీ20లో భారత మహిళల జట్టు ఇంగ్లాండ్పై విజయం సాధించింది. 8 పరుగుల తేడాతో గెలిచి.. సిరీస్ను సమం చేసింది. నిర్ణయాత్మక చివరి టీ20 బుధవారం జరగనుంది.
తొలుత బ్యాటింగ్లో షెఫాలీ వర్మ(38 బంతుల్లో 48), సారథి హర్మన్ ప్రీత్ కౌర్( 25 బంతుల్లో 31) చెలరేగారు. స్మృతి మంధాన(20), దీప్తి శర్మ(24) సైతం రాణించగా.. నిర్ణీత 20 ఓవర్లలో 4 వికెట్లకు 148 పరుగులు చేసింది టీమ్ ఇండియా. ఇంగ్లాండ్ బౌలర్లలో సివర్, విలియర్స్ కట్టుదిట్టంగా బంతులేశారు.
ఫీల్డింగ్ అదరహో..
అనంతరం బ్యాటింగ్ ప్రారంభించిన ఇంగ్లాండ్ ఓ దశలో సునాయాసంగా గెలిచేలా కనిపించింది. 31 పరుగులకే రెండు వికెట్లు కోల్పోయినా.. ఓపెనర్ బ్యూమాంట్ 59, కెప్టెన్ హెథర్ నైట్ 30 పరుగులు చేసి భారత్ను భయపెట్టారు. మూడో వికెట్కు 75 పరుగులు జోడించారు. విజయం దిశగా సాగుతున్న తరుణంలో.. భారత మహిళల అద్భుత ఫీల్డింగ్తో ఇంగ్లాండ్ ఇన్నింగ్స్ పేకమేడలా కూలిపోయింది. ఆ జట్టులో నలుగురు బ్యాటర్లు రనౌటవ్వడం గమనార్హం. చాలా మంది సింగిల్ డిజిట్కే పరిమితమయ్యారు. చివరి ఓవర్లో 14 పరుగులు చేయాల్సి ఉండగా స్నేహ్ రాణా.. చక్కని బంతులేసి కట్టడి చేసింది. ఓవర్లో 5 పరుగులే వచ్చాయి. దీంతో విజయం భారత్ సొంతమైంది.
పూనమ్ యాదవ్ 4 ఓవర్లలో 17 పరుగులిచ్చి 2 వికెట్లు తీసింది. అరుంధతీ రెడ్డి, దీప్తి శర్మ తలో వికెట్ తీశారు. ప్రస్తుతం 3 టీ20ల సిరీస్లో ఇరుజట్లు 1-1తో సమంగా ఉన్నాయి. చివరి మ్యాచ్ బుధవారం జరగనుంది. ఇప్పటికే ఇంగ్లాండ్తో 2-1 తేడాతో వన్డే సిరీస్ ఓడింది టీమ్ఇండియా.
ఇదీ చదవండి: టీమ్ఇండియా-శ్రీలంక తొలి వన్డే జులై 18న
