భారతదేశంలో క్రికెట్కు ఎనలేని ఆదరణ ఉంది. కోట్ల మంది ప్రేమించే ఈ క్రీడలో అరంగేట్రం చేయాలని ఎంతోమంది యువత కలలు కంటారు. అయితే క్రికెట్లో రాణించాలంటే కృషి, పట్టుదలతో పాటు భారత్కు ఆడాలంటే కొంత అదృష్టం కూడా ఉండాలి. ఎందుకంటే ఇతర దేశాలతో పోలిస్తే క్రికెట్లో టీమ్ఇండియాకు ప్రాతినిధ్యం వహించడమనేది చాలా గొప్ప. ఆ లక్ష్యంతో ఎంతోమంది క్రికెటర్లు భారత జట్టులో ఓ వెలుగు వెలుగగా.. మరికొంత మంది పరిమిత మ్యాచ్లు ఆడి సరిపెట్టుకున్నారు. అయితే భారత జట్టు తరఫున కేవలం ఒకే ఒక్క మ్యాచ్తోనే కనిపించకుండా పోయినా క్రీడాకారులూ ఉన్నారు. అలా ఒకే ఒక్క మ్యాచ్ ఆడిన క్రికెటర్లు ఎవరో ఈ సందర్భంగా తెలుసుకుందాం.
1) ఫైజ్ ఫజల్
విదర్భ ఫస్ట్క్లాస్ జట్టుకు చెందిన ఫైజ్ ఫజల్.. 2016లో హరారే వేదికగా జింబాబ్వేతో జరిగిన వన్డేలో అంతర్జాతీయ క్రికెట్లోకి అరంగేట్రం చేశాడు. 30 ఏళ్ల వయసులో టీమ్ఇండియాకు సెలెక్ట్ అయిన తొలి ఆటగాడు ఇతడే కావడం విశేషం. అదే అతడికి చివరి మ్యాచ్ కూడా. ఫస్ట్క్లాస్ క్రికెట్లో 2003లో అరంగేట్రం చేసి.. 125 మ్యాచ్లలో 8,404 పరుగులు నమోదు చేశాడు. అత్యధికంగా 127 పరుగులు నమోదు చేశాడు.
2) విజయ్ రాజేందర్నాథ్
పంజాబ్లోని అమృతసర్కు చెందిన విజయ్ రాజేందర్నాథ్.. 1952-53లో టీమ్ఇండియా తరఫున వికెట్ కీపర్గా అరంగేట్రం చేశాడు. ఆ ఏడాది పాకిస్థాన్తో జరిగిన సిరీస్లో సెలెక్టర్లు అవకాశం ఇచ్చిన నలుగురు వికెట్ కీపర్లలో ఈయన ఒక్కడు. ముంబయి వేదికగా జరిగిన మూడో టెస్టులో నాలుగు స్టంపౌట్లు చేశాడు.. కానీ బ్యాటింగ్ చేసేందుకు అవకాశం రాలేదు. ఆ తర్వాత టీమ్ఇండియాలో అతడు కనిపించలేదు. వికెట్ కీపర్గా విజయ్ కెరీర్లో ఒక్క క్యాచ్ కూడా లేదు.
విజయ్ రాజేందర్నాథ్.. రంజీల్లో బిహార్ టీమ్కు ప్రాతినిధ్యం వహించాడు. వికెట్ కీపర్గా తన కెరీర్లో 844 రన్స్, 34 క్యాచ్లు, 23 స్టంపింగ్స్ సాధించాడు.
3) ఇక్బాల్ సిద్ధిఖీ
2001లో మొహలీ వేదికగా ఇంగ్లాండ్తో జరిగిన టెస్టులో టీమ్ఇండియా తరఫున ఇక్బాల్ సిద్ధిఖీ అరంగేట్రం చేశాడు. దేశవాళీ క్రికెట్లో అటు బౌలింగ్తో పాటు బ్యాటింగ్లోనూ మంచి ప్రదర్శన చేసి ఆల్రౌండర్గా పేరొందాడు. ఆ మ్యాచ్లో 10వ స్థానంలో బ్యాటింగ్కు దిగిన ఆయన 24 పరుగులు సాధించడం సహా ఓ వికెట్ పడగొట్టాడు. ఈ మ్యాచ్ తర్వాత అతడు టీమ్ఇండియా తరఫున ప్రాతినిధ్యం వహించలేదు.
ఇక్బాల్ సిద్ధిఖీ.. 1993-94లో ఫస్ట్క్లాస్ క్రికెట్లో అరంగేట్రం చేశాడు. దేశవాళీ క్రికెట్లో మొత్తంగా 90 మ్యాచ్లు ఆడి 315 వికెట్లు పడగొట్టాడు.
4) మయాంక్ మార్కండే
2019లో ఆస్ట్రేలియాతో జరిగిన టీ20 మ్యాచ్లో అరంగేట్రం చేసిన మయాంక్ మార్కండే కూడా టీమ్ఇండియా తరఫున ఒకే మ్యాచ్కు ప్రాతినిధ్యం వహించాడు. ఈ మ్యాచ్లో 31 పరుగులు నమోదు చేసి.. ఒక్క వికెట్ కూడా సాధించలేదు.
అంతకుముందు ఐపీఎల్-2018లో ముంబయి ఇండియన్స్ జట్టుకు ఆడిన ఈ లెగ్ స్పిన్నర్.. 14 మ్యాచ్ల్లో 15 వికెట్లు పడగొట్టాడు. 2018-19 సీజన్లలో పంజాబ్ జట్టుకు ప్రాతినిధ్యం వహించిన మయాంక్.. 29 వికెట్లు సాధించాడు.
5) కెనియా జయంతిలాల్
1971లో వెస్టిండీస్తో జరిగిన 5 టెస్టుల సిరీస్లో సునీల్ గావస్కర్.. 774 పరుగులు నమోదు చేశాడు. ఈ సిరీస్లోని తొలి టెస్టుకు గావాస్కర్కు గాయం కారణంగా విశ్రాంతి లభించడం వల్ల ఆ స్థానంలో రిజర్వ్ బ్యాట్స్మన్ కెనియా జయంతిలాల్ అరంగేట్రం చేశాడు. ఈ మ్యాచ్ తొలి ఇన్నింగ్స్లో కేవలం 5 రన్స్ నమోదు చేశాడు. ఆ తర్వాత రెండో ఇన్నింగ్స్ ఆడే అవకాశం భారత్కు రాలేదు. దీంతో జయంతిలాల్.. భారత్ తరఫున ఏకైక మ్యాచ్ ఆడిన క్రికెటర్గా నిలిచాడు.
కెనియా జయంతిలాల్.. హైదరాబాద్కు చెందిన రంజీ జట్టుకు 91 మ్యాచ్ల్లో ప్రాతినిధ్యం వహించి.. 4,687 పరుగులు నమోదు చేశాడు.
6) బకా జిలానీ
1936లో ఇంగ్లాండ్తో జరిగిన టెస్టులో టీమ్ఇండియా తరఫున బకా జిలానీ అరంగేట్రం చేశాడు. ఆ సమయంలో టీమ్ఇండియా కెప్టెన్ విజయనగరం మహారాజు, సీకే నాయుడు మధ్య వివాదం నెలకొన్న నేపథ్యంలో నాయుడికి బదులుగా జిలానీకి ఆడే అవకాశం వచ్చింది. ఆ టెస్టులో ఆడిన రెండు ఇన్నింగ్స్లో 4(నాటౌట్), 12 పరుగులు చేసిన బకా జిలానీ.. అటు బ్యాటింగ్తో పాటు బౌలింగ్లోనూ ఆకట్టుకోలేకపోయాడు.
1934-35లో రంజీ ట్రోఫీ ఆరంభ టోర్నీలో హ్యాట్రిక్ వికెట్లు తీసిన బౌలర్గా బకా జిలానీ ఘనత సాధించాడు.
7) పంకజ్ ధర్మాని
దేశవాళి క్రికెట్లో పంజాబ్ జట్టుకు ప్రాతినిధ్యం వహించిన పంకజ్ ధర్మాని.. కెరీర్లో అత్యధిక పరుగులు చేసిన బ్యాట్స్మన్గా ఘనత సాధించాడు. 1996లో ఆస్ట్రేలియా, దక్షిణాఫ్రికాలతో జరిగిన ట్రై-సిరీస్(టిటాన్ కప్)లో భారత్ తరఫున ప్రాతినిధ్యం వహించాడు. అయితే ఈ సిరీస్లో జైపూర్ వేదికగా దక్షిణాఫ్రికాతో జరిగిన మ్యాచ్లోనే ఆడే అవకాశం దక్కించుకున్నాడు. ఈ మ్యాచ్లో కేవంల 8 పరుగులతో సరిపెట్టుకున్నాడు. అంతర్జాతీయ కెరీర్లో పంకజ్కు ఇదే ఏకైక మ్యాచ్.
1999-2000 మధ్య ఫస్ట్క్లాస్ క్రికెట్లో అరంగేట్రం చేసిన పంకజ్ ధర్మని.. 13 మ్యాచ్లు ఆడి.. 1194 పరుగులు నమోదు చేశాడు. ఐపీఎల్ ఆరంభ టోర్నీలో కింగ్స్ ఎలెవన్ పంజాబ్ జట్టుకు ప్రాతినిధ్యం వహించాడు.
8) శ్రీకాంత్ అరవింద్
దేశవాళి క్రికెట్లో కర్ణాటకకు చెందిన శ్రీకాంత్ అరవింద్.. ఓ పవర్హౌస్ లాండివాడు. 2015లో దక్షిణాఫ్రికాతో జరిగిన టీ20 మ్యాచ్లో అంతర్జాతీయ క్రికెట్లో అరంగేట్రం చేశాడు. ఆ మ్యాచ్లో 3.4 ఓవర్లకు బౌలింగ్ చేసి 44 పరుగులు సమర్పించాడు. అయితే అంతకుముందు 2011లో ఇంగ్లాండ్ పర్యటన కోసం ఈ క్రికెటర్ను ఎంపిక చేసినా.. గాయం కారణంగా ఆడే అవకాశం లభించలేదు.
9) ఎమ్జీ గోపాలన్
1933-34లో జరిగిన ఇంగ్లాండ్ పర్యటనలో మద్రాస్కు చెందిన ఎమ్జీ గోపాలన్ అరంగేట్రం చేశాడు. కోల్కతా వేదికగా జరిగిన టెస్టు మ్యాచ్లో భారత్ తరఫున ప్రాతినిధ్యం వహించాడు. ఈ మ్యాచ్లో 19 ఓవర్లు బౌలింగ్ చేసిన గోపాలన్.. ఇంగ్లాండ్ స్టార్ బ్యాట్స్మన్ వికెట్ సాధించాడు.
1934 నవంబరులో రంజీ ట్రోఫీలో అరంగేట్రం చేసిన గోపాలన్.. 1950ల్లో సౌత్ జోన్ టెస్టు మ్యాచ్ సెలెక్టర్గా ఎంపికయ్యాడు. తమిళనాడు, శ్రీలంక మధ్య నిర్వహించే గోపాలన్ ట్రోఫీ.. ఈయన గౌరవార్థం పెట్టినదే!
10) సుడాంగ్సు అబినాష్ బెనర్జీ
టీమ్ఇండియా తరఫున ఏకైక టెస్టు క్రికెట్ మ్యాచ్ ఆడిన వారిలో సుడాంగ్సు అబినాష్ బెనర్జీ ఒకరు. 1948 డిసెంబరులో వెస్టిండీస్తో జరిగిన మ్యాచ్లో అంతర్జాతీయ క్రికెట్లో అబినాష్ బెనర్జీ అరంగేట్రం చేశాడు. ఆ మ్యాచ్లో 5 వికెట్లు పడగొట్టడం సహా రెండు క్యాచ్లు ఒడిసిపట్టాడు. తొలి ఇన్నింగ్స్లో 120.. రెండో ఇన్నింగ్స్లో 61 పరుగులు నమోదు చేశాడు.
అయితే ఈ మ్యాచ్లో బెనర్జీ ఉత్తమ ప్రదర్శన చేసినా ఫలితం లేకుండా ఆట డ్రాగా ముగిసింది. ఆ తర్వాత కొన్నేళ్ల పాటు ఫస్ట్క్లాస్ క్రికెట్లో ఆడిన బెనర్జీకి.. టీమ్ఇండియా సెలెక్టర్ల నుంచి ఎలాంటి పిలుపు రాలేదు.
ఇదీ చూడండి.. గుడ్న్యూస్.. ఒలింపిక్స్లో క్రికెట్కు అంతా సిద్ధం!
