ప్రపంచ టూర్ ఫైనల్స్లో భారత స్టార్‌ షట్లర్లు పీవీ సింధు, కిదాంబీ శ్రీకాంత్‌కు ఆరంభ మ్యాచ్ల్లో ఓటమి ఎదురైంది. మహిళల సింగిల్స్ గ్రూప్‌-బీలో ప్రపంచ నంబర్‌వన్ షట్లర్‌ తై జు యింగ్‌తో తలపడిన మ్యాచ్‌లో సింధు ఓటమిపాలైంది. తొలి గేమ్‌లో 21-19తో తెలుగు తేజం పైచేయి సాధించగా.. రెండో గేమ్‌లో ప్రత్యర్థి 21-12తో విజయం సాధించింది.
నిర్ణయాత్మక మూడోగేమ్‌లో తొలుత తైజు 6-3తో ఆధిక్యంలోకి వెళ్లింది. సింధు గొప్పగా పోరాడి 6-6తో స్కోరు సమం చేసింది. కానీ కొన్ని పొరపాట్లతో సింధు మరోసారి ప్రత్యర్థికి పాయింట్లు సమర్పించుకుంది. 17-21తో ఆ గేమ్‌ను మ్యాచ్‌ను కోల్పోయింది. ఇప్పటివరకు తై జు యింగ్‌తో సింధు 21 మ్యాచ్ల్లో తలపడగా 16 సార్లు ఓటమిపాలైంది. తన తర్వాతి మ్యాచ్‌లో థాయ్‌లాండ్ క్రీడాకారిణి ఇంతానన్‌ రచనోక్‌తో సింధు తలపడనుంది.
మరోవైపు పురుషుల సింగిల్స్ గ్రూప్‌-బీలో ప్రపంచ నంబర్‌-3 ఆటగాడు అండర్స్ అంటోన్సెన్‌తో జరిగిన పోరులో శ్రీకాంత్ 21-15, 16-21, 18-21తో ఓటమిని చవిచూశాడు. రౌండ్ రాబిన్ లీగ్‌ పద్ధతిలో సాగే ఈ టోర్నీలో గ్రూప్‌లో తొలి రెండు స్థానాల్లో నిలిచిన షట్లర్లు సెమీస్కు అర్హత సాధిస్తారు.
భారీ ప్రైజ్ మనీ..
ఈ ఏడాది.. ప్రపంచ టూర్ ఫైనల్స్ ప్రైజ్ మనీని రూ.10.94 కోట్లుగా నిర్ణయించారు. మొదటి 8 ర్యాంకుల్లో నిలిచిన ఆటగాళ్లు ఈ టోర్నీ ఆడటానికి అర్హులు. పురుషుల, మహిళల సింగిల్స్తో పాటు డబుల్స్, మిక్స్డ్ డబుల్స్ నుంచి ప్లేయర్ల ఎంపిక ఉంటుంది.
ఎనిమిది మందిని ఆటగాళ్లను నలుగురు చొప్పున రెండు గ్రూపులుగా విభజిస్తారు. గ్రూపు మ్యాచ్లు రౌండ్ రాబిన్ ఫార్మాట్లో జరుగుతాయి. ప్రతి గ్రూపులో మొదటి రెండు స్థానాల్లో ఉన్నవాళ్లు సెమీస్కు అర్హత సాధిస్తారు.
తన కెరీర్లో నాలుగు ఫైనల్స్లో ఆడిన సింధు.. 2018లో విజేతగా నిలిచింది.
ఇదీ చదవండి: మరోసారి ఛాతినొప్పితో ఆస్పత్రిలో చేరిన గంగూలీ
