పారిస్ వేదికగా జరుగుతున్న ఓర్లీన్ మాస్టర్స్ టోర్నీలో భారత షట్లర్లు శుభారంభం చేశారు. మహిళల సింగిల్స్ తొలి రౌండ్లో సైనా నెహ్వాల్.. ఐర్లాండ్ ప్లేయర్ రాచెల్పై విజయం సాధించింది. కేవలం 21 నిమిషాల పాటు జరిగిన పోరులో 21-9, 21-5 తేడాతో ప్రత్యర్థిని వరుస సెట్లలో మట్టికరిపించింది సైనా.
టోక్యో ఒలింపిక్స్కు అర్హత పొందాలంటే.. ఈ టోర్నీలో అత్యుత్తమ ప్రదర్శన చేయాల్సిన అవసరం ఉంది. రెండో రౌండ్లో ఫ్రాన్స్ షట్లర్ మేరీ బాటోమెన్తో తలపడనుంది సైనా. వారం క్రితం జరిగిన ఆల్ఇంగ్లాండ్ ఓపెన్లో తొడ గాయం కారణంగా టోర్నీ నుంచి వైదొలిగిందీ స్టార్ ప్లేయర్.
భారత పురుషుల సింగిల్స్ మాజీ నెంబర్ వన్ కిదాంబి శ్రీకాంత్.. మరో భారత షట్లర్ అజయ్ జయరామ్పై గెలుపొందాడు. తొలి రౌండ్లో బై సాధించిన శ్రీకాంత్.. రెండో రౌండ్లో 21-15, 21-10తో విజయం సాధించాడు. కాగా, అజయ్ తన తొలి రౌండ్లో సహచరుడు అలప్ మిశ్రాను ఓడించాడు. 19-21, 23-21, 21-16 తేడాతో అలప్ ఓటమి పాలయ్యాడు.
మిక్స్డ్ డబుల్స్ విభాగంలో ఇండియా జంట ప్రణవ్ జెర్రీ చోప్రా-సిక్కి రెడ్డి.. ఆస్ట్రియా జోడీ డొమినిక్ స్టిప్సిట్స్-సెరెనా యోంగ్పై విజయం సాధించింది. రెండు వరుస సెట్లలో 21-7, 21-18 తేడాతో గెలుపొందింది. తమ తదుపరి మ్యాచ్లో డెన్మార్క్కు చెందిన నిక్లాస్ నోహ్ర్-అమలై మాగెలండ్తో పోటీ పడనుందీ భారత ద్వయం.
మహిళల సింగిల్స్ మెయిన్ డ్రా నుంచి అర్హత పొందిన మరో భారత షట్లర్ ఇరా శర్మ.. తొలి మ్యాచ్లో అదరగొట్టింది. ఫ్రాన్స్ క్రీడాకారిణి లియోనైస్ హుయెట్పై 12-21, 21-14, 21-17తో విజయం సాధించింది. తన తర్వాతి మ్యాచ్లో బల్గేరియా ప్లేయర్ మరియా మిత్సోవాతో బరిలోకి దిగనుంది.
ఇదీ చదవండి: ఇంగ్లాడ్తో వన్డేలకు శ్రేయస్ దూరం- ఐపీఎల్కు డౌట్!
