భారత స్టార్ బ్యాడ్మింటన్ జోడీ సైనా నెహ్వాల్, పారుపల్లి కశ్యప్.. డెన్మార్క్ ఓపెన్ నుంచి వైదొలిగారు. ఈ విషయాన్ని మంగళవారం అధికారికంగా ప్రకటించిందీ జంట. వచ్చే ఏడాది జనవరిలో నిర్వహించనున్న ఆసియా పర్యటన నుంచి బరిలోకి దిగాలని నిర్ణయించుకున్నట్లు ఓ మీడియాకు ఇచ్చిన ఇంటర్వ్యూలో సైనా తెలిపింది. భార్యాభర్తలిద్దరూ ఇంతకుముందే ఈ టోర్నీ కోసం తమ ఎంట్రీలను పంపారు. సెప్టెంబరులో వారి సమ్మతి లేఖను బ్యాడ్మింటన్ అసోసియేషన్ ఆఫ్ ఇండియా(బాయ్)కు సమర్పించారు.
ఇప్పుడు ఉన్నట్లుండి తప్పుకోవడానికి ఫిట్నెస్ సమస్యల్లాంటి కారణాలేమైనా ఉన్నాయా అని అడగ్గా.. "గాయాలకు సంబంధించి ఎటువంటి సమస్య లేదు. ఒకవేళ మూడు టోర్నీలు నిర్వహించి ఉంటే బాగుండేది. ఇక నేరుగా జనవరిలో జరిగే ఆసియా పర్యటనతోనే సీజన్ ప్రారంభిస్తా" అని సైనా స్పష్టం చేసింది.
అక్టోబరు 13న డెన్మార్క్ ఓపెన్ ప్రారంభం కానుంది. అదే నెల 18న చివరి మ్యాచ్తో టోర్నీ ముగియనుంది.
