విశాఖలో బ్యాడ్మింటన్ అకాడమీ, స్పోర్ట్స్‌ స్కూల్‌ ఏర్పాటు చేసేందుకు ప్రముఖ బ్యాడ్మింటన్ క్రీడాకారిణి పీవీ సింధుకు.. ఆంధ్రప్రదేశ్‌ ప్రభుత్వం రెండు ఎకరాల స్థలాన్ని కేటాయించింది. విశాఖ గ్రామీణ మండల పరిధిలోని చినగదిలిలో 72/11, 83/5, 83/6 సర్వే నంబర్లలో పశు సంవర్థకశాఖకు చెందిన మూడు ఎకరాల్లో రెండు ఎకరాలను క్రీడలు, యువజన వ్యవహారాల శాఖకు.. ఒక ఎకరాన్ని వైద్య ఆరోగ్యశాఖకు బదలాయిస్తూ రెవెన్యూ శాఖ ముఖ్య కార్యదర్శి వి.ఉషారాణి గురువారం ఉత్తర్వులు జారీ చేశారు. క్రీడలు, యువజన వ్యవహారాల శాఖ ఆ రెండు ఎకరాలను పీవీ సింధు బ్యాడ్మింటన్ అకాడమీ కోసం ఇస్తుంది. అకాడమీ రిజిస్ట్రేషన్‌ సర్టిఫికెట్‌, మూడేళ్ల కాలానికి ఐటీ రిటర్నులు సమర్పించడమే కాకుండా నిబంధనల ప్రకారం మిగతా షరతులన్నీ పూర్తి చేశాక ఆ భూమిని పీవీ సింధు బ్యాడ్మింటన్ అకాడమీకి బదలాయిస్తారు.
రిటైరయ్యాక శిక్షణ.. సింధు:
"అకాడమీ నిర్మాణానికి స్థలం కేటాయించిన ముఖ్యమంత్రి జగన్మోహన్‌రెడ్డికి కృతజ్ఞతలు. ఆంధ్రప్రదేశ్‌లో క్రీడాభివృద్ధి కోసం సీఎం కృతనిశ్చయంతో ఉన్నారు. విశాఖపట్నంలో బ్యాడ్మింటన్ అకాడమీ లేదు. అందుకే అక్కడ అత్యున్నత స్థాయి మౌలిక వసతులతో అకాడమీ ఏర్పాటు చేయాలని భావించా. ప్రభుత్వం కూడా సానుకూలంగా స్పందించింది. కరోనా మహమ్మారి తగ్గగానే అకాడమీ నిర్మాణం పనులు మొదలవుతాయి. తొలి దశలో అకాడమీ నిర్మిస్తాం. తర్వాతి దశలో స్పోర్ట్స్‌ స్కూల్‌ ఏర్పాటు ప్రతిపాదన ఉంది. నేనింకా ఆడుతున్నా. ఆట నుంచి రిటైరైన తర్వాత అకాడమీలో శిక్షణ బాధ్యతలు చేపడతా. ప్రభుత్వం అడిగిన అన్ని వివరాలు త్వరలోనే అందజేస్తాం" అని పి.వి.సింధు ఈనాడుతో వివరించింది.
ఇదీ చదవండి: ఇటాలియన్ ఓపెన్ క్వార్టర్స్లో జకోవిచ్, నాదల్
