మాజీ ఛాంపియన్లు పీవీ సింధు, కిదాంబి శ్రీకాంత్ ఈ ఏడాది ఇండియన్ ఓపెన్లో ఫేవరెట్లుగా బరిలోకి దిగుతున్నారు. ఈ టోర్నీ మార్చి 26 నుంచి 31 వరకు దిల్లీలోని ఇందిరా గాంధీ ఇండోర్ స్టేడియంలో జరగనుంది. విజేతలకు 2 కోట్ల 41 లక్షల రూపాయల ప్రైజ్మనీ దక్కనుంది.
- సింధు, శ్రీకాంత్పై భారీ ఆశలు...
ఇండియన్ ఓపెన్ మహిళల విభాగంలో పీవీ సింధు ఒకసారి(2017) విజేతగా నిలిచింది. పురుషుల విభాగంలో శ్రీకాంత్ 2015లో టైటిల్ కైవసం చేసుకున్నాడు. ఈ ఇద్దరిపై ఈ ఏడాది కూడా భారీ ఆశలున్నాయి.
- గతేడాది వరల్డ్ టూర్ ఫైనల్స్లో సత్తా చాటిన సింధు... ఇటీవల జరిగిన ఇండోనేషియా టోర్నీ, ఆల్ ఇంగ్లండ్‌ బ్యాట్మింటన్ ఛాంపియన్‌షిప్‌లో నిరాశపరిచింది.
- ఆల్ ఇంగ్లండ్‌ ఛాంపియన్షిప్ విజేత 'యుఫీ చెన్' సహా జపాన్ టాప్ క్రీడాకారిణులు ఈ టోర్నీలో పాల్గొనకపోవడం సింధుకు కలిసొచ్చే అంశం.
- సింధు తొలి మ్యాచ్లో ముగ్ద ఆగ్రేతో తలపడనుంది. ఈ మ్యాచ్లో గెలిస్తే క్వార్టర్స్లో ఎనిమిదో సీడ్ దనీష్ మియాతో ఆడనుంది. ఈ ఆటలో ప్రధాన పోటీ సింధు, చైనీస్ క్రీడాకారిణి మూడో సీడ్ బింగ్జియావ్ మధ్యనే ఉండనుంది.
- కిదాంబి శ్రీకాంత్ ఆరంభ మ్యాచ్లో హాంకాంగ్ ఆటగాడు వోంగ్ వింగ్తో తలపడనున్నాడు.
సైనా నెహ్వాల్ దూరం...
ఇటీవల ఆల్ ఇంగ్లండ్‌ బ్యాడ్మింటన్‌ ఛాంపియన్‌షిప్‌లో కడపునొప్పితో బాధ పడిన సైనా ఇంకా విశ్రాంతి తీసుకుంటోంది. ఫలితంగా ఈ టోర్నీకి దూరమైంది. కాని ఈ టోర్నీలో సైనా నెహ్వాల్ రెండు సార్లు(2010, 2015) విజేతగా నిలిచింది.
సింగిల్స్-డబుల్స్...
ఈ వరల్డ్ టూర్ సూపర్ 500లో పురుషుల సింగిల్స్లో ప్రణీత్, ప్రణవ్, పారుపల్లి కశ్యప్, శుభంకర్ డే, అజయ్ జయరామ్ ఆడనున్నారు.
- పురుషుల డబుల్స్ విభాగంలో మను ఆత్రే- సుమీత్ రెడ్డి పాల్గొననున్నారు.
- మహిళల డబుల్స్ విభాగంలో అశ్విని పొన్నప్ప-సిక్కిరెడ్డి, మేఘన-పూర్విశ బరిలోకి దిగుతున్నారు.
మిక్స్డ్ డబుల్స్ విభాగంలో ప్రణవ్- సిక్కిరెడ్డి జోడీపై ఆశలున్నాయి.
