ప్రతి ఏడాది ఫిబ్రవరి 4న ప్రపంచవ్యాప్తంగా క్యాన్సర్ డే నిర్వహిస్తారు. ఈ ప్రాణాంతక వ్యాధి గురించి ప్రజల్లో అవగాహన కల్పించడం సహా దానికి వ్యతిరేకంగా పోరాడిన వారిని ఈ రోజు గుర్తు చేసుకుంటారు. అయితే బాలీవుడ్లో చాలామంది స్టార్స్.. క్యానర్ బారిన పడి, దానిని జయించారు. ఇతరుల్లో స్ఫూర్తిని నింపుతున్నారు. క్యాన్సర్ దినోత్సవం సందర్భంగా వారి గురించి ఓసారి తెలుసుకుందాం.
సంజయ్ దత్
ఊపిరితిత్తుల క్యాన్సర్తో తాను బాధపడుతున్నట్లు బాలీవుడ్ స్టార్ సంజయ్ దత్ గతేడాది వెల్లడించారు. లాక్డౌన్ తర్వాత చికిత్స కోసం విదేశాలకూ వెళ్తున్నట్లు తెలిపారు. ఈ క్రమంలోనే సినిమాలకు కొన్ని నెలలు విరామం తీసుకుంటున్నట్లు తెలిపారు. అయితే అదే ఏడాది అక్టోబరులో క్యాన్సర్ను జయించానని ఆయన ప్రకటించడం విశేషం.
మనీషా కొయిరాలా
2012లో అండాశయ క్యాన్సర్ బారిన పడిన నటి మనీషా కొయిరాలా.. ఆ తర్వాత కొన్నాళ్ల పాటు సినిమాలకు విరామాన్ని ప్రకటించింది. వ్యాధికి చికిత్స తీసుకుంటున్న సమయంలో 'హీల్డ్' పుస్తకాన్ని రాసింది. క్యాన్సర్పై ఆమె చేసిన పోరాటాన్ని అందులో పొందుపర్చింది. అనంతరం కొన్నాళ్లకు క్యాన్సర్ నుంచి పూర్తి కోలుకుని.. 'డియర్ మాయ'(2017) చిత్రంతో పునరాగమనం చేసింది మనీషా.
సోనాలీ బింద్రే
క్యాన్సర్తో చేసిన పోరాటంలో నటి సోనాలీ బింద్రే అందరికీ స్ఫూర్తిగా నిలిచింది. కొన్నేళ్ల క్రితం ఈ ప్రాణాంతక వ్యాధి బారిన పడిన ఆమె.. చికిత్స కోసం న్యూయార్క్ వెళ్లింది. అలాంటి క్లిష్ట సమయంలోనూ సామాజిక మాధ్యమాల్లో చురుగ్గా ఉంటూ.. తన ఆరోగ్య సమాచారాన్ని ఎప్పటికప్పుడు పంచుకుంది. ఓ సందర్భంలో తన వెంట్రుకలన్నీ రాలిపోతూ బట్టతల వచ్చేలా ఉందని పోస్ట్ కూడా చేసింది. తాను క్యాన్సర్పై చేస్తున్న పోరాటాన్ని ఓ నోట్ ద్వారా పంచుకుంది.
"గత రెండు నెలలుగా, నా జీవితంలో మంచి, చెడు రోజులు కలిసి వచ్చాయి. నేను చాలా అలసిపోయిన, బాధతో ఉన్న రోజులు అందులో ఉన్నాయి. చేతి వేలు లేపడానికి కూడా చాలా బాధగా అనిపించేది. ఇది ఓ చక్రంలా ఒంటి నొప్పులతో పాటు మానసిక ఆవేదనకు దారి తీసింది. అలాంటి ప్రతి క్షణాన్ని ఎదుర్కొంటూ.. క్యాన్సర్పై నిరవధిక పోరాటం చేశాను" అని సోనాలీ బింద్రే ఆ నోట్లో పేర్కొంది.
అనురాగ్ బసు
'లూడో' దర్శకుడు అనురాగ్ బసు.. రక్త క్యాన్సర్ (లుకేమియా) బారిన పడ్డారు. ఈ వ్యాధితో చాలా బాధలు పడ్డారు. క్లిష్ట సమయంలోనూ ప్రాణాంతక వ్యాధితో ధైర్యంగా పోరాడి, క్యాన్సర్ను జయించారు.
తాహిరా కశ్యప్
బాలీవుడ్ హీరో ఆయుష్మాన్ ఖురానా భార్య, చిత్రనిర్మాత తాహిరా కశ్యప్.. గతంలో రొమ్ము క్యాన్సర్ బారిన పడింది. ఈ వ్యాధితో తీవ్రంగా పోరాడి.. చివరకు దానిని జయించింది. ఈ వ్యాధి గురించి ఇప్పటికీ ప్రజల్లో అవహగాన కల్పించేందుకు తన వంతుగా కృషి చేస్తోంది.
ఇదీ చూడండి: కరోనా సంక్షోభంలోనూ తరగని కోహ్లీ బ్రాండ్ వాల్యూ!
