ప్రస్తుతం సమాజంలో జరుగుతున్న సైబర్‌ నేరాల పట్ల ఎంత అప్రమత్తంగా ఉండాలో తెలియజెప్పే చిత్రమే 'చక్ర' అని విశాల్ అన్నారు. ఆయన హీరోగా నటిస్తూ స్వీయ నిర్మాణంలో తెరకెక్కించిన చిత్రమిది. ఎం.ఎస్‌. ఆనందన్‌ దర్శకుడు. శుక్రవారం ప్రేక్షకుల ముందుకొస్తుంది. ఈ నేపథ్యంలో విశాల్ విలేకర్లతో చిత్ర విశేషాలు పంచుకున్నారు.
* సినిమాలో హీరో తండ్రి ఆర్మీ అధికారి. యుద్ధ సమయంలో ఆయన ప్రదర్శించిన ధైర్య సాహసాలకు అశోక చక్ర అవార్డు వస్తుంది. అయితే కొంతమంది దుండగులు దాన్ని దొంగిలిస్తారు. ఈ కేసును ఆర్మీలోనే పనిచేసే ఓ సైనికుడు ఎలా చేధించాడు? ఈక్రమంలో అతనికెదురైన సవాళ్లేంటి? అన్నది మిగతా చిత్ర కథ. అందుకే ఈ కథకు తగ్గట్లుగానే టైటిల్‌ 'చక్ర' అని పెట్టాం. సినిమాలో ఆఖరి 9 నిమిషాలు ఒక థ్రిల్లింగ్‌ సీక్వెన్స్ ఉంటుంది. అది అందరికీ కనెక్ట్ అవుతుంది.
*సైబర్‌ క్రైమ్‌ కథాంశం కావడం.. నేను మిలటరీ అధికారిగా కనిపిస్తుండటం వల్ల అందరూ ఇది 'అభిమన్యుడు'కి సీక్వెల్‌ అనుకుంటున్నారు. కానీ, కాదు. ఆ సినిమాకు పూర్తి భిన్నమైన చిత్రమిది. ఎంతో పరిశోధన చేసి ఆనందన్‌ ఈ స్క్రిప్ట్‌ సిద్ధం చేశారు.
* ప్రస్తుతం నా బెస్ట్‌ ఫ్రెండ్‌ ఆర్యతో కలిసి 'ఎనిమీ' చిత్రం చేస్తున్నా. అలాగే నా స్వీయ దర్శకత్వంలో 'అభిమన్యుడు 2' తెరకెక్కించనున్నా. వీటితో పాటు తెలుగులో నేరుగా ఓ సినిమా చేయనున్నా.
