'సైరా', 'సాహో'లాంటి తెలుగు సినిమాలు.. ఇంగ్లీష్లో డబ్ కావాలని అన్నాడు హీరో విజయ్ దేవరకొండ. హైదరాబాద్లో బుధవారం జరిగిన టెర్మినేటర్: డార్క్ ఫేట్ చిత్ర తెలుగు ట్రైలర్ విడుదల కార్యక్రమానికి ముఖ్య అతిథిగా విచ్చేశాడు. ఈ సినిమాతో తనకున్న అనుబంధాన్ని పంచుకున్నాడీ కథానాయకుడు.
"డిస్నీ సంస్థ.. హాలీవుడ్లో తాము నిర్మించిన చిత్రాల్ని తెలుగు భాషలో విడుదల చేస్తోంది. అదేవిధంగా మేం తీసిన ‘సాహో’, ‘సైరా’, ‘వరల్డ్‌ ఫేమస్‌ లవర్‌’లాంటి సినిమాల్ని కూడా హాలీవుడ్‌కు తీసుకెళ్లాలి. నేను ఈ చిత్రాన్ని ఇంగ్లీష్‌తోపాటు తెలుగులోనూ చూస్తాను. సరైన స్క్రిప్టు వస్తే బాలీవుడ్‌లో కూడా నటిస్తాను" -విజయ్ దేవరకొండ, హీరో
టెర్మినేటర్ సిరీస్‌లో ఇది ఐదో చిత్రం.ఆర్నాల్డ్‌ స్క్వార్జ్‌నెగర్‌ ప్రధాన పాత్ర పోషించాడు. టిమ్‌ మిల్లర్‌ దర్శకత్వం వహించాడు. ప్రముఖ దర్శక నిర్మాత జేమ్స్‌ కేమరూన్‌ నిర్మించాడు. 1991లో వచ్చిన ‘టెర్మినేటర్ 2: జడ్జిమెంట్‌ డే’కు సీక్వెల్‌గా ఇది రూపొందింది. వచ్చే నెల 1న తెలుగు, హిందీ, తమిళం, కన్నడం, మలయాళ భాషల్లో ప్రేక్షకుల ముందుకు రానుంది.
