కరోనా కారణంగా సినీ పరిశ్రమ స్తంభించిపోయింది. లాక్డౌన్ కారణంగా అందరూ ఇళ్లకే పరిమితమయ్యారు. వేరే కథలు వింటూ, కొత్త సినిమాలు ప్రకటిస్తూ.. షూటింగ్ల కోసం ఎదురుచూస్తూ గడిపారు హీరోలు, దర్శకులు, సహాయ నటులు, సిబ్బంది. ప్రస్తుతం మహమ్మారి తీవ్రత తగ్గడం వల్ల సెట్లో అడుగుపెట్టేందుకు సిద్ధమవుతున్నారు. ఈ నేపథ్యంలోనే పెద్ద చిత్రాలతో సహా చిన్న సినిమాలూ చిత్రీకరణ ప్రారంభించుకునేందుకు రెడీ అయ్యాయి. ఆ చిత్రాలేంటో చూద్దాం.
- నాగ చైతన్య, రాశీ ఖన్నా ప్రధానపాత్రల్లో విక్రమ్ కె.కుమార్ దర్శకత్వం వహిస్తోన్న చిత్రం 'థ్యాంక్యూ'. ఇప్పటికే సగానికిపైగా చిత్రీకరణ పూర్తి చేసుకున్న ఈ సినిమా ఈ నెల 21 నుంచి షూటింగ్ పునఃప్రారంభించుకోనుంది.
- సమంత ప్రధానపాత్రలో గుణశేఖర్ తెరకెక్కిస్తోన్న చారిత్రక నేపథ్యమున్న సినిమా 'శాకుంతలం'. ఈ సినిమా కోసం భారీ సెట్ రెడీ చేసినా.. కరోనా కారణంగా చిత్రీకరణ నిలిచిపోయింది. తాజాగా ఈ నెల 24 నుంచి ఈ చిత్రం సెట్లోకి అడుగుపెట్టనుంది.
- రవితేజ హీరోగా రమేశ్ వర్మ తెరకెక్కిస్తోన్న చిత్రం 'ఖిలాడి'. ఇప్పటికే సగానికిపైగా షూటింగ్ పూర్తి చేసుకుందీ సినిమా. కరోనా తీవ్రత తగ్గడం వల్ల చిత్రీకరణ పునఃప్రారంభించుకోనుంది. జూన్ 26 నుంచి ఈ సినిమా చిత్రీకరణ మొదలవనుంది.
- వెంకటేశ్, వరుణ్ తేజ్, తమన్నా, మెహరీన్ ప్రధానపాత్రల్లో అనిల్ రావిపూడి తెరకెక్కిస్తోన్న చిత్రం 'ఎఫ్ 3'. ఇప్పటికే విజయవంతమైన 'ఎఫ్ 2'కి సీక్వెల్గా రూపొందుతోందీ సినిమా. తాజాగా ఈ చిత్రం జులై 1నుంచి సెట్లోకి అడుగుపెట్టనుందట.
- రామ్ చరణ్, జూనియర్ ఎన్టీఆర్ ప్రధానపాత్రల్లో జక్కన్న రాజమౌళి చెక్కుతోన్న అద్భుత దృశ్యకావ్యం 'ఆర్ఆర్ఆర్'. ఇప్పటికే మేజర్ పార్ట్ షూటింగ్ పూర్తి చేసుకుంది. కరోనా మహమ్మారి కారణంగా చిత్రీకరణ నిలిచిపోయింది. ఇప్పుడు కొవిడ్ తీవ్రత తగ్గడం వల్ల జులై 1 నుంచి మూవీ షూటింగ్ పునఃప్రారంభంకానుంది.
- వీటితో పాటు మెగాస్టార్ చిరంజీవి 'ఆచార్య', ప్రభాస్ 'రాధేశ్యామ్' జులై మొదటి వారంలో సెట్లోకి అడుగుపెట్టనున్నాయి.
