శేఖర్ మాస్టర్.. టాలీవుడ్లో పరిచయం అక్కర్లేని పేరు. స్వయంకృషితో అంచెలంచెలుగా ఎదిగిన వ్యక్తి. ఎంతో మంది హీరోల చేత స్టెప్పులు వేయించి.. శెభాష్ అనిపించుకున్నారు. వారు వీరు అనే తేడా లేకుండా అందరి హీరోలకు అభిమాన కొరియోగ్రాఫర్గా గుర్తింపు తెచ్చుకున్నారు. ఇటీవల కాలంలో బుల్లితెరపై కనిపించి తనవంతుగా వినోదాన్ని పంచుతున్నారు. అలాంటి శేఖర్ మాస్టర్కు గూగుల్ ఒక్కసారిగా షాక్ ఇచ్చింది. శేఖర్ మాస్టర్ అని గూగుల్లో సెర్చ్ చేస్తే.. ఆయన చనిపోయినట్లు చూపిస్తోంది. గూగుల్ చూపించిన దాని ప్రకారం మాస్టర్ తమిళనాడులోని చెన్నైలో 1963లో పుట్టినట్లు ఉంది. దీనితో పాటే 8 జులై 2003లో చెన్నైలోని కోడంబక్కమ్లో ఆయన మరణించినట్లు పేర్కొంది. వాస్తవానికి ఇది నిజం కాదు.
కోలీవుడ్కు చెందిన జీవీ శేఖర్ అనే నటుడిని ముద్దుగా మాస్టర్ శేఖర్గా పిలుచుకుంటారు. ఆయన 8 జులై 2003న చనిపోయారు. అయితే పొరపాటున వికిపీడియా జీవీ శేఖర్ మరణించిన రోజును శేఖర్ మాస్టర్కు అన్వయించింది. దీంతో శేఖర్ మాస్టర్ పేరుతో సెర్చ్ చేసిన వారికి మాస్టర్, అతని కుటుంబ సభ్యుల ఫోటోలు దర్శనమిస్తూ.. చనిపోయినట్లు చూపిస్తోంది. అయితే దీనిపై శేఖర్ మాస్టర్ ఏమీ స్పందించకపోయిన.. అభిమానులు మాత్రం గూగుల్ తీరు పట్ల గుర్రుగా ఉన్నారు.
2007లో ఇండస్ట్రీకి పరిచయమైన శేఖర్ మాస్టర్..ఇటీవల రిలీజైన 'రంగ్దే' సినిమాకు కొరియోగ్రాఫర్గా పని చేశారు. ప్రస్తుతం విడుదలకు సిద్ధంగా ఉన్న 'లవ్ స్టోరీ'లోని 'సారంగదరియా' పాటకు కూడా ఆయనే నృత్యరీతులు సమకూర్చారు.
ఇదీ చూడండి: షూటింగ్లో గాయపడ్డ విశాల్.. వీడియో వైరల్
