దక్షిణాదితో పాటు బాలీవుడ్లోనూ ఐకాన్ స్టార్ అల్లుఅర్జున్కు ఎంత క్రేజ్ ఉందో ప్రత్యేకంగా చెప్పనక్కర్లేదు. నటన, స్టైల్, డ్యాన్స్, ఫైట్స్.. ఇలా అన్నింటిలో వైవిధ్యాన్ని చూపుతూ తనకంటూ ఓ ప్రత్యేక గుర్తింపు తెచ్చుకున్నారు. చివరిసారిగా ఆయన 'అల వైకుంఠపురములో' సినిమాతో బిగ్గెస్ట్ హిట్ను అందుకున్నారు. త్వరలోనే సుకుమార్ దర్శకత్వంలో పాన్ ఇండియా సినిమాగా రూపొందుతున్న 'పుష్ప' సినిమాతో ప్రేక్షకుల ముందుకు రానున్నారు. సుకుమార్-బన్నీ కలయికలో ఇప్పటికే వచ్చిన రెండు సినిమాలు హిట్ అవ్వడం వల్ల.. పుష్పపై అభిమానుల్లో భారీగా అంచనాలు నెలకొన్నాయి. ఈ చిత్రంతోనే నేరుగా ఆయన హిందీలోనూ ఎంట్రీ ఇవ్వనున్నారు.
తాజాగా ఓ ఇంటర్వ్యూలో పాల్గొన్న బన్నీ.. ఈ చిత్రం కోసం తాను బాగా కష్టపడుతున్నట్లు చెప్పారు. 'అల వైకుంఠపురములో' సినిమా విజయం తర్వాత తనపై ఒత్తిడి బాగా ఎక్కువైందని అన్నారు. అన్నీ భాషల్లో 'పుష్ప'పై అభిమానులు పెట్టుకున్న భారీ అంచనాలకు చేరువయ్యేలా.. డ్యాన్స్, ఫైట్స్ విషయంలో మరింత ప్రత్యేక శ్రద్ధ తీసుకుంటున్నట్లు తెలిపారు.
ఈ సినిమాలో రష్మిక హీరోయిన్. ఎర్ర చందనం అక్రమ రవాణా నేపథ్యంలో సాగే కథ ఇది. మైత్రీమూవీ మేకర్స్‌ సంస్థ నిర్మిస్తోంది. దేవీశ్రీ ప్రసాద్‌ సంగీతం అందిస్తున్నారు. మలయాళ నటుడు ఫహాద్ ఫాజిల్ విలన్గా నటిస్తున్నారు. ఆగస్టు 13న ప్రేక్షకుల ముందుకు రానుందీ చిత్రం. కాగా, ఇటీవల బన్నీకు కరోనా సోకింది. ప్రస్తుతం ఆయన స్వీయనిర్బంధంలో ఉన్నారు.
ఇదీ చూడండి: 'తగ్గేదే లే' అంటున్న 'పుష్ప'రాజ్‌
