2015 జులై 10. 'బాహుబలి' తొలిపార్ట్ నాలుగు భాషల్లో రిలీజ్. దర్శకుడు ఎస్.ఎస్.రాజమౌళి. ప్రభాస్, అనుష్క, తమన్నా, రానా.. ఇలా కేవలం తెలుగు ఆడియెన్స్కు మాత్రమే తెలిసిన నటీనటులు. కానీ సినిమా చూసిన ఇతర భాషల ప్రేక్షకులకు మైండ్ బ్లాంక్. అసలు కట్టప్ప 'బాహుబలి'ని ఎందుకు చంపాడు?
ఈ సినిమా రెండో పార్ట్ వచ్చినంత వరకు ఇదే చర్చ. కేవలం తెలుగు ఆడియెన్స్ మాత్రమే కాదు ప్రపంచవ్యాప్తంగా ఉన్న సినీ ప్రేమికులు ఈ సినిమా గురించే మాట్లాడుకోవడం మొదలుపెట్టారు. ఎక్కడ చూసిన దీని గురించే మాట్లాడుకోవడం. అలా తెలుగు సినిమా స్థాయిని 'బాహుబలి' అమాంతం పెంచేసింది. అప్పుడు మొదలైంది తెలుగు సినీ పరిశ్రమలో కొత్త శకం. అప్పటి నుంచి ఇప్పటివరకు అది సాగుతూ సరికొత్త ట్రెండ్ చేస్తూ దూసుకుపోతుంది.
ఈ మధ్య రిలీజైన 'పుష్ప' సినిమానే తీసుకోండి. తొలుత దీనిని పాన్ ఇండియా స్థాయిలో రిలీజ్ చేయలేమని అనుకున్నారు. కానీ చివర్లో హడావుడిగా అసలు ఏ మాత్రం పబ్లిసిటీ లేకుండా నార్త్లో(ఉత్తరాది) రిలీజ్ చేస్తే ఏకంగా రూ.75 కోట్లకు పైగా వసూళ్లు సాధించింది. ఓ ప్రాంతీయ సినిమా పవర్ ఏంటో చూపించింది. ఒకప్పుడు ఇండియన్ సినిమా అంటే బాలీవుడ్ అనుకునే చాలామంది ఆలోచనను తెలుగు సినిమా మార్చేసింది, మార్చుతోంది, మార్చబోతుంది.
హద్దుల్ని చెరిపేస్తూ..
టెక్నాలజీ పెరిగి, ఓటీటీల రాకతో సినిమాలపై ఉన్న ప్రాంతీయ భావన పోయింది. తెలుగు రొమాంటిక్ సినిమాలు, తమిళ థ్రిల్లర్లు, మలయాళ నేటివిటీ సినిమాలను హిందీ, ఇతర భాష ప్రేక్షకులు ఎగబడి చూస్తున్నారు. భాష అర్థం కాకపోయినా సరే సబ్టైటిల్స్తో రిపీట్ షోలు వేస్తున్నారు. ఇవన్నీ చూస్తుంటేనే అర్థం చేసుకోవచ్చు తెలుగు సినిమా స్థాయి ఏ రేంజ్లో పెరుగుతుందనేది. 'ఆర్ఆర్ఆర్', 'రాధేశ్యామ్', 'లైగర్' తదితర సినిమాల కోసం ప్రేక్షకులందరూ ఆత్రుతగా ఎదురుచూస్తున్నారు.
పెరుగుతున్న రీమేక్లు
ఒకప్పుడు ఇతర భాషల్లో బాగా ఆడిన, ఆడియెన్స్ ఆదరణ పొందిన సినిమాలు తెలుగులో రీమేక్ అయ్యేవి. కానీ ఇప్పుడు ట్రెండ్ మారింది. తెలుగులో మాత్రమే విడుదలై హిట్లు కొట్టిన సినిమాలు.. ఇతర భాషల్లో రీమేక్ అవుతున్నాయి. మన సత్తా ఏంటో ఆడియెన్స్కు అర్థమయ్యేలా చేస్తున్నాయి.
అల్లు అర్జున్ 'అల వైకుంఠపురములో', ప్రభాస్ 'ఛత్రపతి', 'ఎఫ్2', 'హిట్', రవితేజ 'క్రాక్', అల్లరి నరేశ్ 'నాంది', 'అల వైకుంఠపురములో' చిత్రాలు హిందీ రీమేక్ అవుతున్నాయి. ఇంకొన్ని సినిమాలు ఈ లిస్ట్లో చేరేందుకు రెడీ అవుతున్నాయి.
ఇతర భాషల డైరెక్టర్లు మన హీరోలతో..
ఒకప్పుడు మన హీరోలు ఇతర భాషల డైరెక్టర్లతో చేయడం చాలా తక్కువ. కానీ 'బాహుబలి' తర్వాత తెలుగు సినిమా తెగ క్రేజ్ తెచ్చుకుంది. దీంతో ఇతర భాషల డైరెక్టర్లు మన కథానాయకులతో సినిమాలు చేసేందుకు ఆసక్తి చూపిస్తున్నారు. ఇందులో ప్రభాస్ ముందు వరుసలో ఉన్నారు.
ఓవైపు తెలుగులో యువ దర్శకులకు అవకాశమిస్తూనే బాలీవుడ్ స్టార్ డైరెక్టర్ ఓం రౌత్తో 'ఆదిపురుష్', కన్నడ స్టార్ దర్శకుడు ప్రశాంత్ నీల్తో 'సలార్' సినిమాలు చేస్తున్నారు ప్రభాస్.
మరోవైపు మన దర్శకులు కూడా ఇతర భాషల్లోని స్టార్ హీరోలతో సినిమాలు చేస్తున్నారు. విజయ్తో వంశీ పైడిపల్లి, శివకార్తికేయన్తో అనుదీప్ లాంటి దర్శకులు ఈ లిస్ట్లో ఉన్నారు. ముందు ముందు ఈ ట్రెండ్ మరింత పెరిగే అవకాశాలు ఉన్నాయి.
ఇవీ చదవండి:
