'సుశాంత్​ది ఆత్మహత్య చేసుకునే స్వభావం కాదు'

సుశాంత్ రాజ్​పుత్ ఆత్మహత్య విషయంపై తాజాగా స్పందించింది అతడి మాజీ ప్రేయసి అంకితా లోఖండే. సుశాంత్​ది ఆత్మహత్య చేసుకునే స్వభావం కాదని వెల్లడించింది.

బాలీవుడ్ నటుడు సుశాంత్ సింగ్ రాజ్​పుత్ ఆత్మహత్య చేసుకుని నెల గడిచిపోయింది. తాజాగా ఇతడి మరణంపై ఆసక్తికర వ్యాఖ్యలు చేసింది రాజ్​పుత్ మాజీ ప్రేయసి అంకితా లోఖండే. సుశాంత్​ది సూసైడ్ చేసుకునే స్వభావం కాదని వెల్లడించింది.

"నాకు తెలిసినంత వరకు సుశాంత్ డిప్రెషన్​తో బాధపడలేదు. అతడి లాంటి వ్యక్తిని నేను చూడలేదు. అతడు తన కలల్ని ఓ డైరీలో రాసుకునేవాడు. తానేం చేయాలో, ఎలా ఉండాలో అనే కొన్ని విషయాలపై ఒక ఐదేళ్ల భవిష్యత్ ప్రణాళిక రూపొందించుకున్నాడు. అలాగే వాటిని సాధించాడు. కానీ సుశాంత్ డిప్రెషన్​లో ఉన్నాడని అంటున్నారు. అది చాలా బాధగా ఉంది. కొన్నిసార్లు నిరాశ చెందేవాడు. ఒత్తిడికి గురయ్యేవాడు. కానీ డిప్రెషన్​ అనేది చాలా పెద్ద పదం." అంటూ చెప్పుకొచ్చింది అంకిత.

అలాగే సుశాంత్ ఎలా ఉండేవాడో చెబుతూ.. "సుశాంత్ చిన్న పట్టణం నుంచి వచ్చాడు. సొంతగా ఎదిగాడు. నాకు నటన సహా చాలా విషయాల గురించి చెప్పాడు. ఎవరికైనా తెలుసా అసలు నిజమైనా సుశాంత్ ఎలా ఉండేవాడో? ఎవరికి తోచింది వారు చెబుతున్నారు. ఇవన్నీ వింటుంటే బాధగా ఉంది. సుశాంత్​ చిన్న విషయాల్లో సంతోషం వెతుక్కునేవాడు. వ్యవసాయం చేయాలనుకున్నాడు. 'ఏదీ కుదరకపోతే షార్ట్ ఫిల్మ్ తీస్తా' అని చెప్పేవాడు. ఎవరు ఏమన్నా అతడో హీరో.. అందరికీ స్ఫూర్తి." అంటూ భావోద్వేగంతో మాట్లాడింది అంకిత.

సుశాంత్, అంకిత.. 'పవిత్ర రిష్తా' అనే సీరియల్​లో కలిసి నటించారు. 2016 వరకు రిలేషన్​లో ఉన్న వీరిద్దరూ మనస్పర్థలు రావడం వల్ల విడిపోయారు.