దిల్లీలోని వీధికి సుశాంత్ రాజ్​పుత్ పేరు

దక్షిణ దిల్లీలోని ఓ వీధికి బాలీవుడ్ దివంగత నటుడు సుశాంత్ సింగ్ రాజ్​పుత్ పేరు పెట్టనున్నారు. దీనికి సంబంధించి అధికారుల నుంచి అనుమతి లభించినట్లు ఆ కాలనీ కౌన్సిలర్ తెలియజేశారు.

గతేడాది జూన్ 14న బాలీవుడ్ న‌టుడు సుశాంత్ సింగ్ రాజ్‌పుత్ ఆత్మహత్యకు పాల్పడ్డారు. ఆయ‌న భౌతికంగా మ‌న మ‌ధ్య లేక‌పోయిన జ్ఞాప‌కాల ద్వారా అంద‌రి మ‌న‌సుల‌లో చెర‌గ‌ని ముద్ర వేసుకున్నారు. తాజాగా ఆయ‌న జ్ఞాప‌కంగా దక్షిణ దిల్లీ ఆండ్రూస్ గంజ్​లోని ఓ ర‌హ‌దారికి సుశాంత్ సింగ్ రాజ్‌పుత్ పేరు పెట్టారు. దీనికి అధికారుల నుంచి ఆమోదం లభించింది.

ఎస్​డీఎమ్​సీ కాంగ్రెస్ కౌన్సిలర్ అభిషేక్ దత్​ గతేడాది సెప్టెంబర్​లో వీధికి సుశాంత్ పేరు పెట్టాలని ప్రతిపాదన చేశారు. బుధవారం జరిగిన సమావేశంలో దీనికి ఆమోదం లభించినట్లు ఓ అధికారి తెలియజేశారు.

గురువారం సుశాంత్ జయంతి సందర్భంగా ఈ విషయాన్ని తెలిపారు అభిషేక్. "రోడ్ నెం.8లో ఎక్కువగా బిహార్ నుంచి వచ్చిన వారు ఉన్నారు. వారు ఆండ్రూస్ గంజ్ నుంచి ఇందిరా క్యాంప్ వరకు ఉన్న మార్గానికి 'సుశాంత్ రాజ్​పుత్ మార్గ్'​గా నామకరణం చేయాలని డిమాండ్ చేశారు. అందువల్లే ఈ ప్రతిపాదన చేశా" అని దత్ వెల్లడించారు.